Uttar Pradesh khawpui, Lucknow (North)-a Superintendent of Police thar chu tlangval la naupang tak, Anoop Singh a ni a. A enkawl huam chhunga police station pakhat, Vibhuti Khand-ah chuan constable pakhat, Janardhan Singh a awm ve a, ani hi constable dang ang erawh a ni lo, SP Annop Singh-a pa a ni. An lal dan indawta en chuan a pa chu a hnuai fê-a awm a ni a, a pa zawk hian an inhmuh apiangin zahna chibai a buk (salute) ziah tur a ni bawk.
SP Anoop Singh hian Pathianni khan a awmna thar tur hi a zawm a, a kaihhruaina hnuaiah a pain hna a thawk ve dawn a, Janardhan Singh-a te pu ber chu a fapa a ni dawn tihna a ni.
He mite pafa hian mi dang ang bawkin, hna an thawhna hmunah chuan dan an zawm ve a ngai dawn a; mahse, a pa chuan, “Kan hnain a ken tel a nih angin ka fapa hi chibai ka buk dawn,” a ti a, in lama duh duha a tirh theih ni mah se hnaah chuan chu chu seng luh a tum lem lo.
A fapa hlawhtlinna chuan a tilawm takzet tih Janardhan Singh chuan a sawi a, a fapa hnuaia thawk thei a ni chu a inchhuang a, a hnuaia thawh pawh a nawm a rin thu a sawi a. “Ka fapa hi ka aia lal zawk angin ka en tlat dawn a, chu chu ka tan pawh chawimawina a ni,” a ti.
Dan ang chuan Janardhan Singh hian a fapa hi a duty lai chuan a salute ziah a ngai dawn a, a ti mai dawn tih a sawi a, “Kei aiin police a nihnaah hian a tha zawk bawk ang,” a ti bawk.