US actor leh ‘Friends’ sitcom lar tak atanga hriathlawh comedy star Matthew Perry chu kum 54 mi niin a thi.
Kum 1990s chho vela TV sitcom ‘Friends’ ah khan ‘Chandler Bing’ lemah changin, hneh rem tak takin lemchan khawvel hip bei theitu hi nimin piah khan Los Angeles-a a chenna In-ah thi-a hmuh a ni.
Friends hi New York City-a cheng thian tha paruak te inlanna hmuhnawm tak niin, 1994 atanga tihchhuah niin, 2004 thleng a awh.
Final episode hi US-ah ringawt pawh mi maktaduai 52.5 in an en a, 2000s tir lama TV episode en nasat ber a ni.
Perry hi 1969 khan Massachusetts-ah a lo piang a, Ottawa, Canada-ah a seilian thung. Tuna Canadian prime minister Justin Trudeau te nen sikul an kal ho nghe nghe.
Tleirawl a nih hian Perry hi Los Angeles-ah let lehin, ‘Boys Will Be Boys’-ah Chazz Russel lema changin lemchan khawvel a dailut tan a, ‘Growing Pains’-ah hming a chher zui bawk.
Amaherawhchu, international star nihna erawh ‘Friends’ atang chiah khan intanin, New Yorker paruak te khawsa ho hmuhnawm tak mai, dating, career leh friendship nena thuam vel ni bawk show hian hlut a hlawh ham ham hle.
Hollywood star lar tak ni zui ta Jennifer Aniston te bakah Courtney Cox, David Schwimmer, Matt LeBlanc leh Lisa Kudrow te an inlan.