Aizawl: Mizo Zirlai Pawl (MZP) chuan Aizawla hnam dang dan lova khawsa dapchhuah hnatlang an nei.
Inrinnia Aizawl khawpuia hnam dang dan lova khawsa dapchhuah hnatlangah hian Inner Line Permit (ILP) nei lo mi 78 chuang bakah kumtlinglo hnathawka chhawr eng emaw zat an hmu chhuak a, dan zawm lo an mante chu thuneitute kutah an hlan nghal a ni.
MZP chuan sorkar leh thuneitute pawhin theihtawp chhuaha hma an lak mek laia tuk khat hnatlanga hnam dang dan lova khawsa leh dan lova sumdawng thahnem tak man chhuah tur an awm chu pawi an tih thu an sawi a. An mi mante hi a tam zawk chu permit nei lo bakah permit dam hun chhung zo tawhte an nih thu an sawi.
India danpuiin a bik taka Mizote a humhalhna dan, ILP chu a nihna ang taka hmang tur leh a pekchhuah danah thuneitute chu fimkhur leh zuala kalpui tura ngen nawn lehin, Mizoram chhunga local council leh village council thuneitute ILP pekchhuak kawngah lehkha pawimawh felfai lo chu hriatpuina pe tawh lo turin MZP chuan an ngen bawk.
Dan lova hnam dang khawsate dapchhuah hnatlangah hian MZP hruaitute bakah College hrang hrang Students Union (SU) hruaitute leh Hnampual Zirlai Pawl hrang hrang hruaitu mi thahnem tak an thawk chhuak a ni.