Mexico-a chawlh hmanna khawpui, tun hnai lawka hurricane na takin a nuai hmunah thil bo leh inrawkna a tam em avangin a veng turin sipai leh police 17,000 vel tirh luh an ni.
Video darhah chuan miin dawr atangin ei tur leh tui an la a, mi takin shooping centre atangin electronic bungrua man to tak tak leh thawmhnaw an la lai a lang bawk.
Hurricane Otis thawk avang khan mi 39 an thi tih hriat a ni tawh.
Mi sang tam takin tui leh power an la nei lo bawk.
Otis hian Pacific tuipui atangin Nilaini khan darkar khata km 266-a chak thlipui kengin khawmual a kai a. Darkar 12 chhung lehin tropical storm atangin a na ber, category five hurricane-ah a insiam hman a ni.
Acapulco hi Mexico-ah chuan a tuar na ber zingah a tel a, khualbuk an neih 80% vel chhiain khawlaiah tui a tling nasa hle bawk.
Inrinni thleng khan mi 39 thi tawhin mipa 29 leh hmeichhe 10 an ni tih sorkarin a puang a, mi 10 vel chin an la hre lo.
Social media-a video thehdarhah a tuar na zual vengah chuan tui leh ei tur an tlakchham tan avangin dawr rawka lak a tam hle tih hmuh theih a ni.
Acapulco atanga an ram chhung hmun dang panna kawngui ber chu hawn leh a ni tawh a, ni tin mamawh phurh luh leh tan a ni tawh.
Renacimiento venga chengte chuan puihna engmah an la dawn loh avangin lungawi lohna an lantir.
“Sorkarin eng puihna mah min la pe lo va, beiseina pawh min siamsak lo,” tiin Apolonio Maldonado chuan Reuters news agency hnenah a sawi a, a ngalah hliam a tuar a, a kak duai a tilang bawk.
“Ei tur engmah an nei lo va, mutbu leh thil dang pawh an nei chuang lo,” a ti.
President Andrés Manuel López Obrador chuan khawpui din thar leh a tiam a. Hetih lai hian politics-a a elpuite chuan nakum maia inthlan turah inrawkna thleng chu remchangah hmangin a sorkar beih nan an hmang nasa hle.
“Mulukawlh ang maiin an awm a, mipuite natna hi engah mah an ngai lo, min tihnat an duh a, thihna tam tak thlentir an tum,” tiin social media-a video a dahah a chhang let.
Thuneitute chuan Otis hi Mexico-a Pacific nuai tawhah chuan a thawk na ber niin an sawi a, dollar tluklehdingawn tel man thil a tichhia a ni.