Kerala-a Kalamassery-a thil puakah mi pakhat an thi a, mi 56 velin hliam an tuar bawk niin thuneituten an sawi a. Tawngtai inkhawm tan deuh chiahah minute reilo te kar danah pathum a puak a ni.
Thil thlenna hi Kochi atanga km 10 vela hla, Kalamassery-a Jehovah’s Witnesses convention centre-ah a ni a. A tipuaktu nia hriat mipa kum 48 chu a inpe tawh.
Pathiannia tawngtai inkhawmah hian mi 2,000 dawn an tel a. Tangtai inkhawm hi ni thum chhung ruahman niin Pathianni hi a tawpna ni tur a ni.
A telte chuan tawngtai laiin a nih thu leh an maimitchhing deuh chiah niin thuthar lakhawmtute hnenah an sawi a. “Puak hi hall laiah a ni a, thil puak vawi thum ka hria,” tiin a awm ve pakhat chuan a sawi.
Thuneitute chuan thil puak hi tiffin box chhunga dah niin an sawi.
Kalamassery MP Hibi Eden chuan a puak hmasa ber hi centre-a hall chhungah a ni a. Insaseng tuma ruahmanna siam mek laiin a dang hi a puak zui ta a ni.
“Vanneihthlak takin insaseng dan tur ruahmanna an nei sa a. An sawiho va, insaseng tura an inbuatsaih mek laiin meikhu a tam lutuk a, hei hian innek buaina a thlen zui ta deuh a ni,” tiin NDTV hnenah a sawi.
Police chuan hliam tuar mi 56-te hi district chhunga damdawi in hrang hrangah enkawl an ni a, an zinga 18 chu ICU-ah dah an ni tih an sawi a. Mi paruk chu an dinhmun a tha vak lo niin an sawi.
Kerala Chief Minister Pinarayi Vijayan chuan he thil thleng hi ‘vanduaithlak’ tia sawiin venhimna lam pawh ennawn nghal a ni tih a sawi a. Police hotu lian zawng zawngten thil thlenna hmun hi an pan khawm mek niin a sawi.
Kerala Police chuan Improvised Explosive Device (IED) hman a nih thu leh special investigation team dinin an chhui nghal tih an sawi.
National Investigation Agency-in an chhui zui dawn a, an forensic team chuan a hmun thleng tawhin finfiahna an la khawm mek a. National Security Guard (NSG) an awm tawh bawk.
A hmunah hian fire rescue leh police tam tak awmin mi an saseng a, tlawhpawh theih lohvin an siam.
Video darh thenkhatah chuan convention chhungah hian thil a la kang nasa a, mi te thawm pawh a hriat theih.
Mi thenkhat chuan mei hi thelh an tum a, hall chhungah bawlhhlawh leh thutthleng darh neih nuaih a tam hle bawk.
Kerala Health Minister Veena George chuan damdawi ina thawk zawng zawngte chu an hna thawhna hmunah awm theuh turin a hriattir nghal bawk.
Union Home Minister Amit Shah chuan he thil thleng chungchangah hian Kerala chief minister a be nghal.
Kerala-a inkhawmna hmun beih a nih avang hian Delhi-ah pawh biak inleh metro station zawng zawng chu venhimna tha zawk pek nghal a ni.