BJP National President JP Nadda chuan MNF sorkar flagship programme SEDP chu Mizoram mipuite’n hlawkna pakhatmah an neih phah lo niin a sawi.
Mizoram State Assembly inthlanpui lo awm tura campaign beihpui thlaka Mizoram tlawhtu, BJP National President JP Nadda chuan Inrinni khan Chakma Autonomous District Council (CADC) huam chhunga Kamalanagar tlawhin vantlang inkhawm buatsaihah thu a sawiin, MNF sorkarin SEDP Rs nuai 3 an tiamte chu tihhlawhtlin ni lovin, tuma’n he scheme hi hlawkpui an awm lo niin a sawi.
JP Nadda chuan, Prime Minister Modi-a kaihhruai sorkar hnuaia sorkar laipui scheme hrang hranga hlawhtling taka kalpui a nih thu leh, he’ng scheme hrang hrangte hian ram puma mipui nunah nghawng tha tak a nei tih a sawi a. MNF sorkarin PM scheme hnuaia hamthatna te chu Mizoram mipuiah a thlen loh avangin pawi a tih thu a sawi.
CADC mipuiten harsatna an tawh mekte sawiin, kawngpui inkalpawhna tha lo leh healthcare infrastructure tha tawk lote chu BJP chuan a ngaih pawimawh thu leh, harsatna awm te sutkian a nih tur thu a sawi a. BJP chuan an intiamna te chu an tihhlawhtlin thin thu a sawi bawk.
He hunah hian Tuichawng biala BJP official candidate Durjya Dhan Chakma pawhin thu a sawi a. National BJP Spokesperson Sambit Patra, BJP National Secretary Ritu Raj Sinha, BJP CADC district President Nirupam Chakma leh Lawngtlai West biala BJP candidate JB Rualchinga te pawh vantlang inkhawmah an tel a ni.