Naupang thuawih leh enkawl nuam tak ni turin engtinnge hmâ i lak ang le? Kaihhruaina leh zilhhauna thenkhatte hian thuawihnaah naupang an hruai luh mek laiin, a then erawh hi chuan luhlulna leh runluihna lamah an kal leh mai thin bawk si a, fimkhur hle a ngai reng a ni.
- Chiang takin
Nu leh pa tam takin an tihsual fo thin langsar tak chu, an fate hnena tih tur leh tih loh tur an hriattirna chiang kuang lo leh fel fai lo thin hi a ni a. Naupangin zawm lo ta ang se, hrem an ni leh thin bawk si a, a luhai thlak hle.
Tih tur hriattirnaah hian, chiang tak leh fiah tak, naupangin ‘ti se’ an tih a ni tur a ni a, nu leh pate pawh an chiang-kuang lo anih chuan a ngaihna a awm tawh lo. ‘Zan tin chaw ei hmâ chuan mut loh tur’ tihte hi a nihna takah chuan a chiang lo hle.
Naupang khan men rei a duh vang emaw TV en a châk vangin, chaw a ei tlai lui emaw muang em emin a ei daân tihna a ni a, chumi ai chuan an mut hun tur darkar bituk sak hmiah mai kha a finthlak a, a hahdam thlak zawk bawk.
- A zawm theih mai tur
Dar engzatah chiah nge homework zo hman se, i tih chuan, tan hun tur tak hi chiang takin naupang hian a hre hmasa tur a ni. Dar 7:30 -a zawh tur a nih chuan, homework hi dar 7:25 ah te a tan daih theih a, a hun takah a zawh hman a beiseiawm loh hle a, luhlul tur leh thuawi lo turin i siam tihna a ni thei. Chu ai chuan, homework hi dar 6:30 atanga tan tur a ni i tih a, a zawh hun tur i bituk sak bur a nih loh bawk chuan harsatna i tawh a rinawm lem loh.
- Duhthlanna siam sak
A thil tihna reng rengah duhthlanna siam sak thin ang che. A chunga tarlan angin, zan dar 6:30 veleh emaw film hmuhnawm tak, a en châk ngawih ngawih leh hmuhnawm a tih em em chhuak dawn ta se, a homework chu tunah pawh tinghal mai sela, a hnu-ah a duhzawng film hi a en thei mai dawn a ni.
Eng hun berah emaw a thil tih duh leh a thil tih tuma kha i duhdan nen pawha insiamrem thei turin tan la ang che. Eng-emaw tih tur a nei a, a thil tih laklawk laia film hmuhnawm tak a chhuak mek a ni tih hriat-na a neih chiah khan a buai a, a duhzâwng leh tih tur a sawi hian, kha a thil tih hun tur nena insu buai lo tura a hmalama ruahmanna lo siam sak lâwk hi a fuh a, chuti lo chuan, inhnial buaina leh inhauh buaina a thleng nghal zut zut thin.
- Penkhat zelin
Tih tur i hriattir khan, i duhdan leh a hlawhtlinna turah mit leh beng i chhit kar a ngai tih hria la, chumi tihlawhtling tur pawh chuan amahah engtinnge nghawng a lo thlen ang tihte pawh chhut tel a tha hle.
Entirnan: Nitin tih mai turin sikul a tlai ziah a, a hun dik takah sikul a thlen i duh bawk si a. Zing tin sikul-ah i kalpui thin tak na a, awmzia a nei thui lo hle a, i thupek te lah chu sawi loh ang mai a ni bawk si. Chutah chiah chuan hmalakna dang i ngaihtuah chhuah a ngai dawn ta.
Ni sawm chhung (a zâwnin) a hun takah sikul a thleng chat chat thin a nih chuan, a duhzâwng leh neih a châk em em, Toys emaw Barbie (thil dang pawh a ni thei ang) lawmpuinan i pek tur thu i hrilh mai dawn em ni ang?
Chu aia tha zawka ngaiha chu – Zing tin thawh hun i bituk (insiam, chaw ei leh sikul kal nena innangbuai lo tawkin)-ah nisawm chhung emaw a thawh zat zat theih chuan toys a duh ber i lei sak tur thu hrilh ang che.
- Hetiang hian….
Calendar (mawi leh mit la tak, hlâi lem lo) pe la, a thawh hun darkar chhin-chhiah pui thin ang che.
Tichuan, a hmabak leh hlenchhuah turte chiang lehzualin a hmufiah tawh anga, i chona kha phur taka a chhan ngei a rinawm.