ZPM Research Wing chuan Inrinni khan Aizawl Press Club-ah thu thar thehdarhtute an kawm a, an party policy chu zirchianna behchhana duan a nih avangin a rintlak hle tura an ngaih thu an sawi.
ZPM Research Wing Secretary Dr. K.C. Lalmalsawmzauva chuan research wing an din chhan ber chu zirchianna hmanga Zoram mipui kaihhruai leh hmasawnna thlen a nih thu a sawi a. Mizoramin state a nih hnuah kum 36 chhung zet chu party pahnihten rin thuin Mizoram an kaihruai tawh a, manifesto pawh vote zawn nan an inziah thatsiak mai mai avangin Mizoram chu a chhehvel state-ten an tlan pel duai tawh tih sawiin, “Chutiang dinhmun atanga Mizoram kaichhuak tur leh rin thu ngawt ni lo, zirchianna hmanga Zoram mipuite kaihhruai chu kan tum a ni,” a ti.
Dr KC Lalmalsawmzauva chuan tuna ZPM policy buatsaih kawngah pawh a theih chin chinah zirchianna behchhana kalpui a nih theih nan tha an thawh tih sawiin, “Kan hun leh tha, thiamnate tlem hle mah se, party dang policy leh manifesto ai chuan belhchian dawl zawk turah kan ngai,” tiin, an policy duanah thenkhat chu tihhlawhtlin nghal mai theih a awm rualin thenkhat chu hun duh rei tur chite leh sorkar hnua enzui ngai zelte pawh a awm tih a sawi.
Policy leh manifesto inziah thatsiak ngawt loin, zirchianna behchhan policy hi party tinten neih thin ni se tia an duhna te tihlawhtling hmasatu nih pawh an tum avangin Mizoram chanchina la awm ngai lo zirchianna behchhan policy nei awm chhun chu ZPM party an nih thu a sawi bawk.