Nurse ni thin, Niels Hoegel chuan nimin khan a enkawl tura damdawi ina dah damlo 100 zet a that thu nimin khan a puang.
Nurse Hoegel hi mi thah thubuai siamsak niin nimina a thubuai ngaihtuah ni hmasa berah a inpuang nghal a. Indopui II-na hnu lama serial killing case lian ber a la ni.
Kum 41-a upa, Hoegel hi a hmain damlo thah thubuai avangin kum 10 dawn lung inah a lo tang tawh a, a damlo enkawlte chu an damdawi ei tur aia tam (overdose) eitirin a tihlum thin a ni.
An ram hmar lam, Oldenburg-a a chungthu an relnaah presiding judge Sebastian Buehrmann-an mi 100 zet thata an puhna chu a dik em tih a zawh chuan, “Aw,” tiin a chhang a. “Heng zawng zawng hi ka pawm vek,” tiin courtroom-a a mi that tawhte chhungte awm khawm laiin a sawi a ni.
Nurse Hoegel-a hi Oldenburg-a damdawi ina a thawh laiin mi 34 thatu leh a bul lawk, Delmenhorst-a a thawh laiin mi 66 thatah puh a ni bawk a. Heng thil hi kum 2000 leh 2005 inkara thleng a ni hlawm.
Kum 2000-05 inkar khan Oldenburg damdawi inah mi 34 leh Delmenhorst clinic-a a thawh laiin mi 64 thata puh a ni.
Kum 2005 khan Delmenhorst-ah chawh loh damdawi hmanga damlo a chiu avanga man niin kum 2008 khan kum 7 tang tura tih a ni.
Kum 2014-15 khan a enkawl thi chhungten thata puhin thubuai dang a nei leh a. Mi 5 a that ngei nia ngaiin kum 15 tang tura tih leh a ni.
A psychiatrist hnenah Delmenhorst-ah mi 30 a thah thu a inpuang a. Oldenburg lama a enkawl th chhungte pawhin an ringhlel zui ta zel.
A chhuitute chuan nurse Hoegel-a tihhlum hi mi 200 zet an tlin an ring hial tawh.