Inthlana vote thlak leh thlak loh chungchangah election buatsaihtu lam ten thahnemngai takin tan an la a. Mitinin an duhna ngeia vote thlak turin mipuiah sawmna pawh an tichhuak chuai chuai reng bawk. Vote thlak hi mipui mawhphurhna a ni a. Kum 5 chhunga kan ram enkawltu tur kan thlang dawn a. An chhiat leh thatah mipuiin mawh kan phur lian hle.
Hetianga inthlan buatsaihtuten thahnem an ngaih em em lai hian mipui zingah inthlana vote thlak an chak lem loh thu hriat tur a la awm fo mai. Thenkhat chuan beidawng takin tumah hi an tha tak tak lo. Beiseina nen vote kan thlak a. Kan han thlang lal a, a hmaa mite ang tho bawk. Mahni inhaivur leh mahni chhungkua leh laina hna pe vak vak, hausak tum em em ho bak kan vote chhuak lo tihte an sawi ri zauh zauh mai. Vote thlak tura theih tawpa kan sawm mekte rilru put hmang hian rilru a tina a. Beiseina nena lo penchhuak mi tam tak hi kan ram inrelbawlnaah hian an lo beidawng rilru hle thin tih a chiang khawp mai.
Rilru beidawnna nei an lo awm theihnaah hian kan ram hruaitute hian an mawh an phur tih an inhriat chian a ngai hmm a ni. Hna te an dil ve a, tling ve pawh niin an inhria, mahse an aia thiam lo zawk, tihpuitu nei tha zawk si te an tlin chuan beidawnna bak an tan thildang a awm thei lo. Chutiang bawkin thil dang dangah pawh a ni thin. Engmah ni bik lem lo thin kha Minister leh Mla te duhsak zawng an nih chuan an kâng zawt zawt a. Hetiang an hmuh hian mi tam tak rilru a na in vote thlak châk lohna te, ram inrelbawlna lam hrim hrim bawlhhlawh anga hmuhna te a thleng thin.
Mi beidawngte hi khawvela mi hlauhawm ber an ni an ti thin a. Beidawng chuan pawisak a nei tlem a. Sualna a pung a. Beidawng an tamna ramah dan leh thupek kenkawh a har zual bawk thin. Kan ram mipui hi ramdang nena khaikhin chuan kan la tlem em em a. Nuai 14 vel bak kan la ni hmel lova. Ram enkawlna tur sum central atanga lokal pawh hi a tam thawkhat bawk. Mahse, kan hmasawnna hian ke a pen hlei thei lova. Mi an beidawng pawh hi thil thleng awm lo tak ani lem lo. Thil dang harsatna vang ni lem lo a, beidawnna vanga inthlanna a vote a tlachhia anih chuan kan ram hruaitute an in enlet a ngai takzet ani tih hi hria sela. Ram enkawlnaah hian mipui lam beidawnna siam khawpin ro an rel tha lo tih inhria in ram hruaitu nihna hi chuh lo ngam se a dik ber ang.
Tin, mipui lam pawh hian beidawnga kut sil san ai chuan ram lo enkawl tawh thin hruaitute, vawiin ni thlenga kei ber emaw la intite paih bona remchang ani tih hria a, anmahni dah kiang tur leh a tha zawk beiseia vote thlak vek hi a tha ber a ni.