India-a police-te chuan Kerala-a mi pathum thihna leh mi 50 chuang thihna thil eng emaw zat puak chu an chhui zui mek.
Thil puak hi Kristianpawl pakhat, Jehovah’s Witness-in Pathiannia Kalamassery khuaa hun an hmanna hmunah a ni.
Mipa pakhat, a puah hnuah video tichhuaka a titu a nih thu sawitu chu police kutah inpein man nghal a ni.
Police hian a inpuanna hriat chian tumin an bei zui mek.
“Kan kutah a awm mek a. Kan chhui zui theih tur finfiahna eng eng emaw min pe tawh a. Tun dinhmunah chuan kan la thleng thui lo rih hle,” tiin Additional Director General of Police (Law & Order) MR Ajith Kumar chuan thuthar lakhawmtute hnenah a sawi.
Jehovah’s Witness-in Kalamassery-a tawngtai inkhawm an huaihawtnaah thleng a ni a. Ni thum awh hun an hmanah hian mi 2,000 chuang an tel.
Pathiannia a puah khan mi pahnih an thi nghal a, Thawhtanni tukah khan a taksa 95% vel lai kang hmeichhe naupang kum 12 a thi veleh bawk.
Police hotu sang pakhat, Shaik Darvesh Saheb chuan an chhui tawh chinah chuan tiffin box-a improvised explosive device (IED) tihpuah a anga an hriat thu a sawi.
A puah hnu lawkah hian mipa, Dominic Martin nia insawi chuan a tih a nih thu a puang nghal.
Kum 48 mi hian Facebook-a video a dah chhuahah hei hi a sawi a, tunah chuan paih leh tawh a ni a, a awmna hnaih police station-ah a inpe nghal bawk.
Martin-a hian a beih pawlah hian member a nih ve thu leh ‘ram dona’ thil an inzirtirna avanga a huat thu a sawi.
Hetih lai hian Jehovah’s Witness thupuangtu, TA Sreekumar chuan hetiang inzirtirna an kalpui loh thu a sawi a, Martin-a hi an zingah a tel ve ngai lo niin a sawi bawk.
Thawhtanni khan Kerala Health Minister Veena George chuan damdawi in hrang hrangah hliam tuar mi 17 dah an nih thu a sawi a, an zinga 12 chu intensive care-ah an awm thu a sawi.
“Pali phei chu an dinhmun a tha lo hle a, pathumin ventilator an hmang a. Heng mite hi an taksa 50-60% zet kangte an ni,” a ti.
Chief Minister Pinarayi Vijayan chuan he thil thleng hi a dem thu a sawi a, a chhui turin additional director general of police kaihhruai mi 20 awmna team din a nih thu a puang nghal bawk.
Beihna an tawh sawiho tur hian Thawhtanni khan all-party meeting a ko nghal a. Hetih lai hian India khawpui, Delhi leh khawpui lian dangah chuan venhimna tihkhauh nghal a ni bawk.
Jehovah’s Witness hi Kristian sakhaw kalphung pakhat zuitute an ni a, tun laia kal dan, sakhaw hrang hrang din hi Bible zirtirtna ang a nih loh thu sawi thin an ni a, khawvel atanga inla hrang an ni.
Khawvel pumah an pawl hian zuitu maktaduai 8.7 chuang nei angin an inchhal a, Kerala pawh hi an tamna niin in tinah lutin thu an hrilh nasat avanga hriat hlawh an ni.
Kum 1986 khan he pawla telte hi India-a Supreme Court chuan chhanin naupangte chu zirna inah hnam hla (national anthem) sak luihtir tur an ni lo tiin thu a lo remsak tawh.