Aizawl: Mizoram State Assembly inthlanpui neih turah kum upa leh rualbanlote tana in lama vote thlakna, home voting chu district hrang hrangah kalpui tan a ni.
Aizawl district-ah hian mahni in atanga vote thlak dil hi mi 900 chuang an awm a. Postal ballot-a vote thlakin home voter-te hi an ina kal chilha buaipui ngaite buaipui turin team 25 siam a tirhchhuah an ni.
Aizawl DC chuan home voting hi Mizoramah chuan general election atana hman vawi khatna a nih avangin thenkhat tan la hriat loh palh awm thei a nih thu sawiin, inthlan lo awm zel turah tangkai zawka hman a nih zui zel a beisei thu a sawi.
Nimin vek khan police election duty-ten postal ballot-in vote an thlak bawk a. DEO Nazuk Kumar chuan a hmunah tlawhin a enfiah a ni.
Champhai district-a assembly constituency pathum – Champhai North, Champhai South leh East Tuipui-ah home voting kalpui tan niin, polling party pakuate nimin zing khan DC Office, Keifangtlang atangin an chhuak.
Home voting kaltlanga vote thlak tur hian Champhai North-ah mi 49, Champhai South-ah mi 30 leh East Tuipui-ah mi 11 ten hming pe lutin, nimin khan mi 68-in postal ballot hmangin vote an thlak a ni.
Champhai district chhunga home voting hmanga vote thlakte hi kum kum 80 chung lam vek an ni a, pianphunga rualbanlo (PwD) hming pe lut erawh an awm lo thung.
Lawngtlai district chhunga Tuichawng Assembly Constituency-ah home voting ti tur mi 13 an awm a, Lawngtlai East Assembly Constituency-ah mi 79 leh Lawngtlai West Assembly Constituency-ah mi 11 an awm a. Lawngtlai district pumah mi 103 awmin mobile polling team-ten anmahni inah an kalchilh dawn a ni.
Khawzawl district chhunga assembly constituency awmchhun, Tuichangah nimin khan home voting neih tan ni bawkin, Khawzawl District Election Office atangin polling team parukte chuan an bial chhung khaw hrang hrang an tuam a. Tuichang bial chhungah hian home voting facility hi mi 142-in an dil a, mi 112-te dilna chu pawmsak an ni.
Saiha leh Palak Assembly constituency huam chhungah pawh home voting kalpui tan niin, Saiha bial chhungah polling official pakua awmin, Palak bialah pasarih an awm bawk.
Saiha A/C-ah hian home voting tura hming pe lut mi 69 an awm a, Palak-ah mi 84 an awm.
Thawhtanni vek khan inthlanpui atana lirthei hmang tura tih (requisitioned vehicles) driver leh conductor-te pawhin Siaha District Playground, Siaha Vaihpi-ah vote an thlak bawk.
Saiha bialah hian mi 31 leh Palak-ah hian mi 19-in vote an thlak a, an vaiin mi 50 an ni.
Chawlhkar kal ta Inrinni khan Kolasib district chhunga assembly bial pathum – Tuirial, Kolasib leh Serlui bialah te in lama vote thlak hi kalpui tan a ni tawh bawk.