Aizawl: ZPM Working President K Sapdanga chuan party hlun pahnihin nasa takin ZPM beih rawn mah se tun tum inthlan dawna mi tin sawi chu ‘ZPM thli a tleh’ tih a nih thu a sawi.
Nimina ZPM-in an party pisa-a chhung inkhawm an hmanah K Sapdanga chuan inthlan dawn apiangin eng thli nge tleh tih ngaihvenin mipui an inzawt thin tih sawiin, “Party hlun pahnihten nasa taka min beih rawn karah, tun tum inthlan dawna mi tin sawi chu ‘ZPM thli a tleh’ tih a ni,” tia sawiin, party thli tleh apiangten sorkarna an chang thin tih a sawi.
Inthlan puan hnu SEDP sem theih loh hnu ringawtah ZPM-in mi thar 10,000 chuang an neih belh tawh tih sawiin K Sapdanga chuan, “A tam ber chu ruling MNF atangin a ni. Party pahnih na takin min beih rawn,” tiin, an hotupa Lalduhoma sawichhiatna atan press conference-te an ko hial niin a sawi.
K Sapdanga chuan ZPM leader chu MLA fund ei ruah rin thuin an puh a, a ei ruk lohzia finfiahna an hmu nghal tih sawiin, “A thusawi tluantling lova tan chhumin, a sawi tum loh an theh darhsak a, hetiang taka inbeihna hi UT kan nih atang tawhin a la thleng ngai pawhin ka hre lo,” a ti.
ZPM chu BJP nena sorkar siam tumah an puh tih sawiin K Sapdanga hian, “May 17, 2023-a Headquarters Executive Committee chuan BJP nen thawhho kan tum loh thu resolution kan lo siam tawh. Eng ang pawhin min puh mah se, min puhtute pawhin an awih lo a, BJP pawhin an awih lo a, keini phei chuan kan awih lo lehzual,” a ti bawk.
ZPM working president hian, “MNF sorkar chu mau policy-ah Rs vbc 6.48 hman ral hnuah an ngawihsan hmak a. Rs nuai 3 sem an hlawhchham a, CM-in nuai thum sem a tiam laiin minister pakhat chuan nuai thum sem an tiam loh thu a sawi ve leh a. Eng ber nge awih tur hriat a har hle,” tiin, MNF sorkar chu an thutiamah an hlawhchham chu pawi a tihpui thu a sawi.
PAHOSS a hlawhchham thu sawiin K Sapdanga, “Mi hausate in sakna tur pek belhna mai niin PAHOSS in kawtah traffic a jam luih luih mai a ni. Kawng chhawng hmel kan la hmu lo va, kan CM-in May, 2019 atanga AR-te insawn chhuak tawh tura a sawi tun thlengin an la insawn lo va, health care policy-a sum luan ral tamzia leh a hlawhchham chianzia mi tinin kan hria,” a ti.
ZPM party thil tum chu ram rorelnaa Pathian ram tun din a nih thu sawiin K Sapdanga chuan, “Pathian ram a thlenna hmunah hlemhletna a awm thei lo. Hlemhletna laka roreltute an fihlim phawt chuan, a hnuai lamah corruption hi a tlangnel theih kan ring lo,” tia sawiin, tun tum inthlanah sum a leng leh viau dawnin lang mah se, sum hian mi thinlung a lei theih tawh loh an beisei tih a sawi bawk.