MNF Adviser Prof. F. Lalnunmawia, MLA chuan MNF Sorkarin Flagship Programme-a a neih angin SEDP Family Oriented chu sum harsatna hrang hrang karah kalpui mup mup a ni a. An eizawnna kawnga leirem rahtirna tura bul tanna turin Chhungkaw singruk (60,000) hnenah cheng Singnga (50,000/-) theuh pek an ni tawh a, chhungkaw singruk (60,000) hnenah cheng singhnih leh sangnga (25,000) theuh pek anni tawh bawk tiin, Chhungkaw singruk (60,000) dang thlan leh mek a nih laiin, Election puanin min nang ching ta a, chawlh rih a ni, a ti a. Pathian leh mipui duhsakna hmanga Sawrkarna kan chan leh ngei kan ring a, heng kan hna kal mek hi chak taka bawhzui kan tum a ni, a ti bawk.
MLA Election Manifesto 2023 a MNF-in kan tarlan pawimawh leh langsar tak chu Zoram thalaite eizawnna leh hna thawh bul tanpuina tur, Youth Oriented SEDP hi a ni a, hemi in a tum ber chu zoram thalai eizawnna nghet nei lo te tana eizawnna kawng kawhhmuh leh chumi atana an bul tanna tur sum ngaihtuah sak a ni ang. Zoram thalai te, Mizoram chhung leh pawn lama hna thawk leh hna zawng turte tan Entrepreneurship Development Programme kalpui a ni ang, a ti bawk.
He Policy ah hian thalai te Talent neih thatnate hriatchian (identify) tum a ni ang a, an thiamna leh theihnate hna leh sum leh paia chan tir (professionalize) tura hmalak kan tum a ni. Planning Dept, LESDE leh Mizoram Youth Commission (MYC) te hmang tangkaiin mumal taka ‘Channel’ siamin Youth Oriented SEDP hi kalpui a ni ang a, hemi atan hian Budget ah Fund tam zawk dah a ni ang, a ti bawk.
Youth Oriented SEDP kalpui turah hian mimal, thian leh pawl ho (Society / Company) ang te a eizawnna kawnga hmalakna tur ngaihtuah pui an ni ang, tiin. He lama tui mi thalai ten an tuina leh hnathawh duhzawng (trade) ah Project Plan & Proposal siamin sorkar ah an thehlut ang a, chung project chu sorkar in an bultanna tur sum a ngaihtuah sak ang, Prof. Mawitea chuan a ti bawk.