Manchester khaw club pahnihten tun season a Manchester derby hmasa ber an khel a. Premier League champion Manchester City leh Manchester United te derby inkhel ni awm lo tak ang zawk hialah inhmachhawnin 3-0 in ‘mikhual bengchheng’ Manchester City an chak.
Old Trafford-ah Sir Alex Ferguson-a hunlaia team te zawk leh division hniam atanga kaisang City in Middle East sum hmanga an insiamlen hnuah United manager ropui in thenawm bengchheng tiin a sawi tawh a. Tunah erawh City team hi khawvela tha ber tia chhal ngam niin United zawk chu insiamthat ngai, league hniam zawk team ang maiin an lakah an inkhel.
Inkhel tan tirah United in a tir minute 10 chhung vel nung takin khel ve mahse a bak zawng City chan a ni a. Striker Erling Haaland chuan VAR endik hnua Rasmus Hojlund penalty chawi chu first half-ah goal-ah a khung.
Second half-ah City in goal khung belh turin hun an mamawh tam lo. Chawlhlawk zawh atang ball thunun hneh hle in hnehsawh takin an inpe kual a, fing taka ‘overload’ an siam hnuah United tlarhnung hmunawl remchang chhawrin Bernardo Silva ball siamsak chu Haaland-a’n a tauh lut.
Huntawp hma in Haaland-a’n kheltha Phil Foden khung tur a siamsak ve leh bawk.
United keeper Andre Onana a che tha a, amah vangin Red Devils an mualpho belh lo zawk. City goal khung ngei tura lang vawi engemaw zat a dansak tha thei hle.
Manchester City boss Pep Guardiola chuan, “Helai hmun a chak hi a nuam thin. Player-te an kheltha hle a, kan fans te ka lawmpui bawk. Kum tam tak chhung Sir Alex-a’n a thunun a, United an chungnung thin. Tunhnaiah erawh hei hi kan thlak danglam a ni.”
“A tir minute 5 atanga 10 vel kha ball chhuhsak thei team lakah kan hloh hnem.” tiin inkhel zawhah a sawi.
Manchester United manager Erik ten Hag chuan, “First half kan kheltha a, kan inveng tha. Remchang kan nei nual a, kha aia tha khan hmang tur kan ni. Penalty khan inkhel thui takin a nghawng danglam a ni.” tiin a sawi ve bawk.