Assam-a Lakhimpur district nu pakhat, kum tam tak chhung a pasalin kutthlaka a lo sawisak tawh thin chuan a pasal hi a that a, a lu laksakin police station-ah a pasal lu khaiin a inpe.
He thil hi Pathianni zana thleng kha a ni a, Mazgaon khuaa nu pakhat, kum 48-a upa, Guneswari Barkataky hian Dhalpur police outpost-ah a pasal lu a tan nia a sawi chu plastic bag-ah khaiin a luhpui a. Kum 55-a upa, a pasal, Mudhiram chu a that niin a insawi.
“Kum tam tak chhung kut min thlak tawh a, a chang phei chuan hreipuia min chekin ka inhliam fo thin a. Chhuahsan pawh ka lo tum tawh thin a; mahse, kan fate avangin ka thulh leh thin a. A tawpah chuan amah thah mai hi a tul ta ber niin ka hria a ni,” tiin Guneswari hian tualchhung television channel hnenah a sawi.
An nupa hian fa panga — mipa pahnih leh hmeichhia pathum an nei a. A pasal hi chem (machete) an tih hmangin a that a, km 5 dawna hlaa police station hnai ber thleng plastic bag-a a pasal lu khaiin a inpe a ni.
“Hmeichhia hi police station-ah a pasal lu khaiin a rawn inpe a. Kan zawhnaah chuan a pasal zu rui reng leh kutthlak nasa tak laka himna atan hetiang hian a ti niin a insawi a, kan chhui zui zel rih ang,” tiin police-te chuan an sawi.
Guneswari hi Nilaini khan court-ah hruai tawh a ni a, police-te hian an kawl rih a phalsak a ni.