Aizawl : ZPM chuan thuchhuah siamin, MNF party-in ZPM leh ZPM leader Lalduhoma chu mipui rilru hruai kawi tuma thudik lo hmanga an nei chiam chu, an manifesto te tihhlawhtlin mumal sawi tur an neih loh vangah an puh.
An thuchhuahah ZPM chuan, tun hnaiah MNF party in ZPM leader Lalduhoma chu thudik lo leh belhchiandawl lo hmangin an bei nasa hle niin an tar lang a. “ZPM Leader hi an bei duh a nih pawhin rinthu leh thudik lo ni lo vin, thudik leh belhchiandawl ni thei se kan duh a. Kristian rama hetiang politics tawp leh bawlhhlawh tak chhawm nuna a awm zel tur hi kan phal lo a ni,” an ti.
MNF party in kum 2018-a an intiamna (policy & manifesto)-ah tihhlawhtlin mumal sawi tur an neih loh vang leh, kumin inthlan lo awm turah policy leh manifesto sawi tur an neih tak loh avanga ZPM Leader Lalduhoma chunga tuan taah an ngaih thu leh, Mizoram mipui ten sorkar mai tura an ngaih ZPM leh ZPM leader Lalduhoma sawichhiat chu an policy pui ber a nih tak thu ZPM chuan an tar lang.
MNF party hian politics tuinu, hmana an lo hlawhtlinpui tawh thin ang kha rawn thar thawh leh tum lo se an duh tih ZPM chuan tar langin, “Khawvel a thang zel a, tunah chuan mi an fing tawh a, engkim awlsam taka haichhuah zung zung theih tawhna hun, kum 2023 a ni tawh tih hre reng turin MNF Party hi kan chah bawk,” an ti bawk.