Mizoram Assembly inthlanna vote tlate chhiar ni tura ruat, December 3 chu Pathianni a nih avangin a hun sawn turin ngen fo ni tawh thin mah se Election Commission of India (ECI) chuan inthlanna a vote tla chhiar hun hi a sawn dawn lo.
Chief Electoral Office atanga thudawn danin, tun hnai khan Mizoram Chief Electoral Officer Madhup Vyas chu Delhi-ah kalin ECI hotute a dawr a, heta hian inthlana vote tla chhiar hun a lo ruat tawh chu sawn loin, an kal tlangpui dawn tih hrilh a ni.
Hetihlai hian NGO Coordination Committee chuan vote chhiar ni sawn a nih theih nan theihtawp an chhuah tur thu an sawi a, bawhzui zel dan tur an rel dawn tih an sawi a. A tul chuan ECI dawr tura Delhi-a lamkal intirh chungchang pawh an sawi tawh a. Thutlukna erawh chu an la siam lo.
Vawi thum lai ECI- hnena vote chhiar ni sawn tura ngenna siam tawh bakah MKHC hotute chuan ngenna an siam baka thil kalpui a ngai a nih chuan NGOCC kutah an dah tih an sawi a ni.
Tar lan tawh thin angin ECI-in vote chhiar ni atana a ruat, December 3 chu Pathianni a nih avangin Mizoram Kohhran Hruaitute Committee, political party hrang hrang leh tlawmngai pawl te chuan sawn turin ECI-ah a mal leh a huhoin ngenna an lo thlen tawh thin a, MKHC chuan tum thum lai vote chhiar ni sawn tur hian ngenna a lo thlen tawh a ni.