Aizawl : Serchhip Additional DC Lalnundika hovin nimin khan Serchhip DC meeting hall ah vote chhiar inpuahchahna bultan nan a kaihhnawih mipawimawhte an thukhawm.
Serchhip district chhungah Assembly Constituency pathum – Serchhip, Tuikum leh Hrangturzo te awmin, heng Constituency tina vote tla te chhiar turin ECI duhdan angin ruahmanna siam a ni a. Nimina thukhawm chuan Counting Hall hmunhma tur te, venhimna chungchang te, chanchinbumi te dawnsawn na tur Media Centre ruahman dan tur te an sawiho a. Sorkar hnathawk vote chhiar tur inruat dan tur leh training neih dan tur te, training na hmun tur te sawihovin, ruahmanna an siam nghal.
Kar thar lo awm tur atang hian vote chhiar turte leh vote chhiar kaihhnawiha duty tur official te tan training buatsaih tan nghal turin ruahmanna an siam a. He thutkhawmah hian Assembly Constituency tina Returning Officer leh Assistant Returning Officer te bakah Serchhip SP leh Additional SP, DIPRO leh Assembly Level Master Trainer te an tel a ni.