Aizawl: BJP Mizoram chuan nimin khan Upper Republic-a an pisa, Mipui Run-ah Friday Political Session an nei a. He huna thusawitu, Mamit biala BJP candidate, assembly speaker hlui ni bawk, Lalrinliana Sailo chuan MLA inthlanpui neiha Mamit bial chu sumdawn nan an hmang nia a lan thu a sawi.
Lalrinliana Sailo chuan Mamit bialah BJP candidate niin an hotute duhsakna changin hma an lak thu sawiin, “Nimahsela, Mamit bial hi sumdawn nan an hmang emaw tih mai tur khawpa a awm hi a pawi takzet a, inthlan a nasa taka sum buai a kan buai ta hi a pawi tak zet a ni. Hetiang anih avang hian mipuite pawh hi kan thanharh a hun tawh takzet a, inthlan laia sum tlem kan duh vanga kan ram hma lam hun tur pawh ngaihtuah thei lova kan awmna hian, Mizoram hma lam êng kan neih theih loh phah thin a, nakina kan hnathawh tur pawimawh tak takte hi kan ngaih pawimawha kan thlir a hun tawh zawk a ni,” a ti.
Kum 2024 ah pawh central-ah BJP an la sorkar dawn tih chu mithiamnte sawi dan a nih thu sawiin Lalrinliana Sailo chuan, “Mizoram budget tinung thar tur hian central-a la sorkar tur party, BJP bawk hi min khaichhuaktu atana pawimawh tak a ni,” tiin, PM Modi-a hmalakna ropui ‘Make In India’ chuan India ram hmasawnna nasa takin a thlen niin a sawi.
Lalrinliana Sailo chuan tun hma zawnga thalai lehkhathiam leh talent nei tha tak takte chu foreign-ah hna thawk turin an liam thla zut zut thin tih sawiin, “Tuna infrastructure, industry, healthcare leh IT hub-ah India-in hma a sawn hnuah chuan India ram chuan nasa takin hma a sawn hnuah chuan thalai lehkhathiam, talent nei tha te chuan kan ramah ngei hna an thawk sup sup tawh a, India ram atangin foreign ah kan ram siamchhuah thawnchhuah a ni ta zawk a, economy-ah nasa takin India ram chuan hma a sawn ta zawk a, he hmalakna hi a ropui tak zet a ni,” a ti bawk.