MNF Adviser Lalruatkima chuan Mizoram State Assembly inthlanpui neih zawh takah an party chuan sorkarna an lak leh a rin thu sawiin, ZPM chu an party kalphung thlirin communism chawsangtute ziarang lachhawngah a puh.
Zirtawpnia Mizo Hnam Run-a MNF party chhung inkhawm hun hnihnaah thu sawiin Lalruatkima hian, ‘Pathian leh kan ram tan’ tia beitu MNF sorkar chu harsatna tinreng paltlang chungin, mipui ni tin mamawh erawh hnianghnar takin an pe thei tih a sawi a. MNF dintu Pathian hian kawng laklawhah a kalsan lo ang tih a rin tlat avangin, hlauthawng miah lovin MNF hian sorkarna an lak leh a rin thu sawiin, “Hnehna kan chang a nih chuan mipuite hnenah lawmthu sawi hi kan tihtur hmasa ber a ni ang,” a ti.
‘Sorkarna siam zo an awm lo ang. Thawkho sorkar a din a rinawm’ tih hi inthlan an hriat tawh thlir letin a dik ngai lo tih sawiin Lalruatkima chuan, “Party tê zawkin a lian zawk behchhana mipui hruaikawi tuma an campaign auhla mai a ni. Inthlan zawh hnua thawhhona (post poll alliance) hi din chawp ngaiin a la thleng ngai lo,” a ti.
Mizoramah sorkar inthlak a awm apiangin party leader te an dinnaah an tla thin nia sawiin MNF adviser chuan, “Kan leader Pu Zoramthanga hi a tlin loh hlauhna nei tumah an awm lo. Chuvangin, he ram leh hnam tan hmachhawp hrang hrang kan neihte a hlawhthin theih nan Pathianin hun tha min pe ang a, Zoram mipuiin hun min pe leh ang a, sorkarna kan chang leh ngei ang. A chhan chu inthlan zawh takah khan MNF party te hi a thawkrim leh taima, tangrual tha ber kan ni,” a ti a. Party ngelnghet an nihna leh thawhrimna te an chhunzawm zel chuan Pathianin mal a sawm zel dawn niin sawi bawk.
Lalruatkima chuan party thenkhat chu lal tum hrim hrim tumin an hmanhlel tih sawiin, “Anmahni ni lo zawng chu dik lo, fel lo, Pathian pawl pawh ni lo angin an chhuah a. Sorkarna chelh tawhten engmah ram tan tih nei lo angin an chhuah bawk a. Kohhran, tlawmngai pawl, zirna in lian leh khawtlangah inlungrualna an tichhe nasa em em a ni,” tiin, MNF chuan kohhran leh pawlah inlungrual lohna thlen turin hma a lak ve ngai loh thu a sawi.
MNF Adviser chuan ZPM party chu Soviet Union Communist sorkar ang entawnah puhin, “Politburo ang chiah, thlan ve loh thuneitu sang VUC an din bawk a. Central India rama Communism awn party hoin ‘Non Congress Non BJP’ din tuma hma an la ang chiahin, Mizoramah pawh ‘non congress non MNF’ tih chu an auhla a ni leh zel a. ZPM kalphung leh hlimthla thlir hian Communism chawisangtute ziarang vek an lachhawng a ni,” a ti.
Aizawl West II MNF candidate chuan khawthlang lam leh chhim lam bial, minority-te tamna bial 10-ah bial nga aia tlem lo MNF-in lak a beisei thu sawiin, “Kan lak bang hi Congress leh BJP in an lak a rinawm a. Kan lak ngai lohna bialah kutzungtang kan thliak thei tawh dawn a, kan chak a rinawm. ZPM hian bial 30 la awm atangin majority an lak phak hi a rinawm lo a ni,” a ti bawk.