Aizawl: Lunglei District bawrhsap Ramdinliani’n Inrinni khan Marpara ‘S’-a Zonal YCA Hall-ah North Eastern Council (NEC) project hnuaia electrical wiring leh puanthui training kharna hun chu khuallian niin a hmanpui.
Khuallian Ramdinliani chuan thu sawiin, Ministry of DoNER hnuaia NEC chuan Lunglei district chhunga Bunghmun RD Block hmun hrang hrangah hmasawnna hna a thawk a, chung zingah chuan Marpara ‘S’ khua tihhmasawn nan a hran liau liauin project siam a nih thu a sawi.
Ramdinliani chuan Indoor stadium, High School building, Training/Capacity building centre, Bazar shed, dumping ground te sak a nih dawn bakah sub-centre thuam that a nih tur thu a sawi a. Hmasawnna hna thawh hrang hrangte chu dik leh tling, chhenfakawm tak a nih theih nan an theihna zawn theuhah tan la turin kalkhawmte a sawm a. A tul chuan contractor hna thawk tha lo te chu thuneitute hnena complaint hreh lo turin a chah.
Training chhuakte chu a lawmpui thu sawiin Lunglei district bawrhsap chuan, an thil zirte eizawn nan an hman mai piah lamah, hmun hrang hranga thawn chhuak thei tura hlawhtling ngei turin duhsakna a hlan a. Thlai thar chhuah leh hralh chungchangah te, thil siam chhuah chungchang leh hmasawnna ruhrel din kawngah te sorkar tihsak hun ringawt nghak mai lo va, sorkar nawr kal thei khawp a hma la thin zawk turin a chah bawk.
October 17, 2023 khan training hi nei tanin, ni 18 awh electrical wiring training ah mi 20 an tel a. Ni 30 awh puanthui zirnaah hian mi 15 an tel a. Training pahnihte hi NEC fund hmanga BDO, Bunghmun R.D. Block in a buatsaih a ni.