Germany in coach Julian Nagelsmann hnuaia mahni mual a inkhel an hmachhawn hmasak berah an khingpui an hneh lova, Turkey nen inkhelin 3-2 in an tlawm.
Euro 2024 thleng tur Germany hian an inbuatsaihna tha zawka a kal theih nan September khan coach Nagelsmann hi an lalut a. Berlin a Olympiastadion ah inkhelah hian nakkum atanga team tha din turin an hmabak a la thui tih an khingpuiten an pholang.
Euro 2024 khel tura tling tawh Turkey an khingpuite lakah an kheltha a. Germany in nung takin bul tan mahse inkhel a kal reiin an tlahniam.
Minute 5-naah attacking midfielder Kai Havertz chuan left-back ah khelhtir a ni chungin an goal hmahruai a khung a, Leroy Sane ball pawhlet atang goal a khung.
Halftime dawnah Turkey in Germany tlarhnung talbuai remchangah an la a, Ferdi Kadioglu hmangin an si phurh an sut.
Bayern Munich chherchhuah Kenan Yildiz chuan halftime hma chiahin Turkey goal hnihna a khung leh bawk.
Second half tan hnu lawkah Niclas Füllkrug in Germany tan goal a khung a. Mahse Salih Ozcan chuan Turkey tan goal ban a pet per tawh hnuah minute 70-naah penalty a hlawhchhuak a, Yusuf Sari chuan goal-ah a chantir.
Nagelsmann chuan, “A tir minute 10-nah inkhel kan dahtha thei, mahse first half a chanve vel hnu atang khan kan tlahniam hle.”
“Inthlahdah thei kan ni lova, kan inkhel a kal rei deuh a kan tlahniam nasa thin hi kan insiamthat a ngaihna a ni.” tiin inkhel zawhah a sawi.