AZL: Kolasib Fast Track Court Judge R. Vanlalena chuan a school naupang kum 17 mi pawngsualtua puh, headmaster kum 31 mi chu thiam loh a chantir.
Court thuremna a tar lan a nih danin, Kawnpui khaw nu pakhat chuan a fanu kum 17 mi chu an school headmaster-in a pawngsual tia puhin January 15, 2022 khan Kawnpui Police station-ah FIR a thehlut a, he thubuai hi bawhzui nghalin pawngsualtua puh, Vanlalrawngbawla (31) Kawnpui Vengthara cheng chu man a ni.
Thubuai ngaihtuahtu, Judge R.Vanlalena chuan police-te chhui fiahna report kimchangte, thu hretute thusawi te, thubuai neitu ukil thusawi leh sorkar ukil thusawi te a ngaihthlak hnuah thuthlukna siamin Vanlalrawngbawla chu thiam loh a chantir a, nimin khan District Jail, Kolasib-ah dah luh nghal a ni.
Pawngsualtu hi POCSO dan ang chuan a rei lo berah pawh kum 20 chhung lungin a tang thei dinhmunah a ding mek a. November 29-ah hearing nei lehin hrem a nih dan tur puan a ni ang.