Delhi laka an tlawm hnuah Aizawl FC an inbengtho lehnghal a. An mikhual Namdhari FC lakah goal thum khungin tun season-ah a vawi thumna atan an chak.
Thawhlehni zanah Rajiv Gandhi Stadium-ah Aizawl FC hian Ludhiana a inkhuar Punjabi club an mikhual a. Inkhel tan atangin team hlauhawm zawk an ni.
Ball chang hnem a, khingpuite nawr nasa zawk an ni a. Goal hlauhawm chiang tak erawh an insiam thei mai bik lo.
A nawrtu zawk an ni reng chungin goal khung an harsat a, an goal hmasa ber khung nan minute 42 an nghah a ngai.
Halftime hma in an striker che tha tak Lalrinzuala chuan an goal hmahruai a khung.
Second half-ah minute 63-naah an goal hnihna K. Lalrinfela’n a khung a. Hei hi la duhtawk lovin huntawp hma in R. Lalthanmawia chuan an goal thumna a khung ve leh bawk a ni.
Hnehna an chan avangin Aizawl FC hian khelh nga atangin point 9 an hmu a, palinaah an awm lailawk.
Away inkhel a zawnin vawi li hmachhawn turin result tha an home inkhelah an nei a. Karleh Thawhlehni zan dar 7 hian Rajasthan FC nen an inkhel ang.
Tableng mawng a awm Namdhari hian Pathianni hian Sreenidi Deccan an khel leh dawn.