Phoenix Suns leh Golden State Warriors inkhelah an player-ten tihsual an ngah a, basketball tha leh hmuhnawm en tur tam lohnaah turnover an ngah a, a tawpah erawh Suns in 123-115 in hnehna an chang.
Suns hi a zawnin vawi nga an chakna a ni a, Footprint Center-ah an mikhualte lakah Kevin Durant chuan point 32 a score a. Devin Booker-a’n 25 a belh.
Phoenix hian an court-ah point 23 laia hma hruai lai ni mahse second half-ah an inpawhthlak tir a. Ball an hloh nasat chu an tuar.
Third quarter-ah 83-60 a sang zawk an ni a, mahse Warriors in huaisen taka beilet in fourth quarter-ah second 19 a la awmin 118-115 in Suns an sang zawk. A tawpah erawh Phoenix an tang tluan.
Durant leh Booker te Phoenix chakna hnar an ni a, an pahnihin free throw vawi 29 atang vawi 28 an lut.
An chak hnuah Booker chuan, “Kha aia tha khan kan khelh a ngai, a bak a awm lo. Ball kan chanin kan fimkhur tur a ni a, kan hloh thiang lova, ho taka indan tir kha a theih tawh loh.”
“Fourth quarter-ah point 10, 15 vela kan san zawk tawh chuan lehlam team tan beiseina kan siam tur a ni lo.” tiin an kheltha tawk lova, hmasawn an mamawh thu a sawi.
Hetihlai hian Wariors in an inkhel hnuhnung pariat atang vawi sarih an tlawmna a ni a, 7-9 record an nei mek.
Warriors coach Steve Kerr chuan, “NBA-ah free throw kan chawi hnem lutuk chuan a chak theih loh a, kan insiamthat a ngai. Point 44 a thlawnin kan pe a ni ringawt.” tiin a sawi.
- Celtics in Bucks hneh
Tunkarah dam lohna in tlakbuak mahse Jayson Tatum chuan Milwaukee Bucks lakah a theihna a lantir a. Point 23 leh rebound 11 la in Milwaukee Bucks 119-116 in a hnehpui.
TD Garden-ah Celtics in anni ang thova Eastern Conference a team tha leh Playoffs a thleng thui tura ngaih team an mikhual a. Kuminah an elpuite tan beih tham fee an ni leh danw tih an lantir.
Jaylen Brown chuan Celtics tan point 26 leh assist vawi 8 neiin Kristaps Porzingis leh Derrick White ten 21 leh 13 an nei tel.
Porzingis chuan, “Kan result a lawmawm a, zanina inkhel entu zawng zawngten kan conference a no.1 leh no.2 seed ni tur inkhel a ni tih an hria. Kha khan boruak a ti tang zual a ni.” a ti.
Bucks star Giannis Antetokounmpo chu point 21 chauh score thei a siam nimahsela Milwaukee tan Brook Lopez chuan point 28 a score a, Damian Lillard-a’n 27 a thawh.
Inkhel dangah Los Angeles Lakers in Dallas Mavericks pawtthla teuh mahse point 28 score Kyrie Irving vangin Mavericks in 104-101 in Lakers hi an hneh.