Tun hnaiah Mizorama service airlines company-ten thlawhna chuan man an tisang hle a, kumin anga rate sang hi a la awm ngai lo nia hriat a ni a; thlawhna chuan man to tihniam turin sorkarin hma a la.
Thuthar thehdarhtu thenkhatin an kawmnaah General Administration department hnuaia Civil Aviation Wing hotute chuan dynamic pricing system hmangin thlawhna chuan man hi siam a ni a, thlawhna hmang duh an tam zual lai hian a man a to thin tih an sawi a, kum dangah pawh Krismas dawnah chuan sang thin mah se kumin ang em ema to uchuak erawh a la thleng ngai lo tih an sawi.
Civil Aviation Wing hotute chuan mipuite harsatna tawh mek sukiang turin theihtawp an chhuah a, thlawhtheihna chuan man tihniam turin company pawh an nawr ve reng a, an hotute pawh koin an sawipui thin thu an sawi a, company hian chhuanlam hrang hrang an nei a, thlawhna chuan man hi sorkar laipui thu anga dynamic pricing system hmanga siam a nih avangin an duh anga an tihtlawm theih loh thute an sawi an ti a, tun dinhmunah chuan thlawhna chuan man tihniam tura an ngenna hian awmzia a nei thui tak tak thei rih lo tih an sawi a, “Manipur buaina in a nghawng tel nasa hle bawk,” an ti.
Tun dinhmunah hian Mizoramah thlawhna service hi company pahnih, Indigo leh Alliance Air an awm a. Alliance Air hi Imphal, Shillong leh Gauhati inkara thlawk a, IndiGo hian Gauhati, Kolkata leh Delhi airport inkar a thlawk a, IndiGo hian Mizoramah Airbus A320 a service-tir a ni.
Thudawn danin Airbus lian apiangah a chuan man a tlawm thin a, tuna Mizoram service-te hi a tet avangin a chuan man pawh hi a to lo thei lo niin sawi a ni a, airline service hi awm tam se, thlawhna liante hi service thei se chuan tun aiin chuan man hi a tlawm zawk rin a nih thu thudawnna chuan a sawi.
Thudawn danin Kolkata leh Lengpui inkar thlawhna chuan man hi Rs. 3,000 atanga Rs. 4,500 inkar a ni tlangpui a, tun hnaiah thlawhna chuan man hi a to tan a, tun kar chho leh December 24, 2023 thleng hian Kolkata leh Lengpui inkar chuan man chu Rs. 5,000 atanga Rs. 14,000 a pel tawh a ni.