Ni 23.11.2023 khan sports minister Robert Romawia Royte chuan New Delhi ah ministry of sport atangin Durtlang north a volley ball leh sports diacipline hrang hrang khelh theihna tur hall sakna tur cheng nuai 450 a dawn thu tihchhuah a ni a. A lawmawm hle mai.
Kan sawrkar neih mek mnf party sawrkar chuan kum 5 kalta chhung khan mizoramah sports infrastructure a din tam hle a. A changtu minister sawi dan takah football khelhna tur grass kan phah ringawt pawh ka sawi mai seng lo a ti hial anih kha. Infiamna tura hall hrang hrang sak pawh a tam hle. Kan state sawrkarin department khata a pawisa hman tamna ber pawl ani hial ang. Sawrkar in a hmingthat pui ber pawh sports infrastructure siam hi ani tih theih hial a mawi a ni.
Infiamna lam hi mipui lam pawhin kan tuipui a. Mipui ngaihven lam hi sawrkar chuan a bawh chak ani mai a. Hmasawnna vek tho a ni a, a tha vekah ngai phawt ila.
Hetih ruala pawimawh erawh chu kan infrastructure dinte hi engtinnge kan enkawl zui zel dawn tih ngaihtuah hi a ni. Sports stadium emaw, building lian tak takte hi central lam leh khawi khawi emaw atang hian a sak theih mai a. Amaherawh chu heng kan hmun din ropui tak tak hi enkawl zui ngai vek an ni a. Enkawl loha chul nghal tur, reilotea hman tlak loh mai tur an ni. Enkawl tur hian tu kutah nge kan dah dawn tih pawh ngaihtuah mang lova sak tawp a tam hlein a lang a. Aizawl a Rajiv gandhi stadium te ngei pawh hi tunah hian sports deptt in an enkawl a. Mahse, a lan ropui ang hu a ropui loh ruk riauna a tam hle. Han hman dawn tak taka tui hman tur awm lo, zunin leh ekin kalh tlat ngai a zing hle. Electric bill pek ngai reng, staff pahnih thumin enkawl a, tihfai ngai reng a ni.Tuna a lan danah hi chuan kan enkawl zo lo lek lek ni te pawhin a lang thei.
Hmun hrang hranga infiamna hmunhma kan buatsaih thingtlang lama mite pawh hi enzui ngai a tam hle. Vaibelchhe tela, nei leh nei lova kan siam hi reiloteah ranrual riahkhawmnaah a chang thei. Enkawltu, enkawlna sum lam kan ngaihtuah tel reng hi a ngai a. Mipui lawm zawng anih vanga sum senralna hi hluihlawn thil siam nan kan hmang ang kan tih a hlauhawm ta hle.
Hmun hma kan siam dawnin tu in nge enkawl zui ang, a enkawl zuina tur sum chu engtinnge tih ngaihtuah thleng tel ila. Mi ram hmun tam takah chuan sawrkarin sports infrastructure a din hi tute emaw kutah a enkawl zuina a hlan mai a. An ni chuan sawrkar atangin dan fel takin an enkawl a. Kalphung fel zawk ani tlangpui. Miin engtinnge an lo tih thlir chungin kal i tum ang u.