Kan inthlanna vote chhiar hun pawh kan hnaih ta hle. Chawlhkar lo awm leh turah chuan sawrkar thar ruangam kan hmu tawh turah ngai ila. Kan kohhran leh NGO ten vote chhiar ni te an sawn tir thei emaw, thei lo emaw, chiah rei theih ani tawh lova. Mipui thlan sawrkar chu a pian tho tho a ngai dawn a ni.
Party hrang hrangte thu leh hla han ngaihthlakin sawrkarna chelhtu nih an inbeisei vek a. Sawrkarna mahnia an lak loh pawhin sawrkar siamtu a tan an la in beisei vek bawk. Chutiang chu kan hmabak a kan hmachhawp chu a ni mek.
Tute party mai pawh hian sawrkarna lak emaw, sawrkarna siam pawla tel emaw an tum vek. Chutiang vel karah chuan hei erawh hi kan pawm a ngai. Eng sawrkar pawh nei ila, mipuiin kan duh taka kan thlanchhuah mi 40 kalkhawmte siam sawrkar ani dawn.
Inthlan campaign laia thil lang chiang tak pakhat erawh chu sawrkar tharah chuan tuna kan awmdan kan duh khawp lo. Opposition leh ruling lam auhlaah pawh kan awm dan kan duh khawp lohna hi a lang chiang hle.
Chuvangin sawrkar tharah chuan kan kal dan hlui hmuh kan duh tawh hauh loh tlem han tarlang ila.
Sawrkar tharah chuan thu ringawta hmasawnna insawihmuh, a tak awm silo hi bansan hmak ila. A tak thleng thei ngei leh an thlen theih tur chauh hi insawihmuh tawh ang u. Tawngkam chauh hmasawnna hi hmu tawh lo ila.
Pahnihnaah chuan eirukna hi mitinin kan ngaimawh a. Kan ram thanmawhbawk ani tih kan chiang a. Chuvangin eirukna laka fihlim sawrkar, a hotu luten bul an tan ngei hmuh tur awm se. Hotute leh contractor inthurual ngei nia hriat thil thleng thin hi bo hmak tawh rawh se.
Pathumnaah chuan sawrkar sum renchen tura hma la ngam sawrkar hmu ila. Sawrkar pawisa a tulna ni hauh lova chenralna tur thil chi hrang hrang ang chi hi bo hmak rawh se. Sawrkar expenditure ni ve ringawt, board din ve ringawt, kum 5 zet sum senralna hi bo rawh se.
Sawi tur tam tak a awm. A pawimawh ber pakhat erawh chu mipui rilru kaihruai dik lo thei pawisa insawihmuhna ang chi hi sawrkar thuneitute atangin ri tawh lo se. Vawiin niah hian mipui hian tunhma ang lo takin pawisa hi kan hre em em tawh mai a. Sawrkar atanga hlawkna tel tuma virkual hi an pung tulh tulh a. Mipui pawhin thawk mang lova pawisa hmuhna kan zawng nasa tulh tulh bawk. Hei hi a chhan bul chu pawisa ringawt maia kan hotute tlangau nasa lutuk vang a ni. Kristian dik tak chuan a thawhchhuah ei rawh se, a harsatna a pui turin sawrkar erawh a ding ang tih bak hi sawi ri tawh lo ila. Engkim maia sawrkar in hma la tura kan beiseina pawh hi a ziaawm ngei a rinawm a ni. Chuvangin sawrkar tharah chuan PAWISA SAWI RI RENG TLANGAU hi bo teh se.