Kartawpah Premier League a hmahruaitu leh pahnihna niin bul an tan a, mahse an inhneh theih loh avangin an dinhmun tha an hloh. Manchester City in Liverpool mikhualin 1-1 in an inhnehtawk.
Inrinni zan Etihad Stadium a inkhelah Liverpool in minute 80-na a Trent Alexander-Arnold goal khung hmangin an si phurh an sut a. Premier League champion lai khelmuala tun season a point hmu hmasa ber an ni.
Manchester City tan striker Erling Haaland chuan minute 27-naah goal a khung a. Liverpool goalkeeper Alisson chetsual remchangah la in Premier League a a goal 50-na a khung.
Norway striker hi Premier League a goal 50 khung tling rang ber niin match 48 chiah a mamawh a ni.
City in Ruben Dias hmangin hnehna tichiang turin goal an khung belh niin a lang hman a, mahse Alisson laka foul avangin goal pawm a ni lo. Hemi hnuah hian goal an khung theih loh rah City in an tuar a. Jeremy Doku-a’n hnehsawh taka a chhaihbuai Alexander-Arnold-a’n a tawpah a team a dampui.
Manchester City boss Pep Guardiola chuan, “Kan kheltha hle, kum riat hnuah pawh kan khelhdan a la ngai reng a, kan la tlahniam miah lo hi thil lawmawm tak a ni.”
“Team tha tak lakah kan kheltha a, kawng engkimah kan that a ngai bawk.” tiin inkhel zawhah a sawi.
Liverpool boss Jurgen Klopp chuan, “Helai hmunah hian inkhelh a awlsam ngai lo. Kha aia han kheltha leh hlek kha ni ila kan chak ang. An mualah phei chuan team tha bik an ni.” tiin a sawi ve bawk.
- A chung berah Arsenal
Arsenal in Premier League a hma hruai turin hnehna an chang a. London club dang Brentford nena inkhelah hnehna chang turin huntawp dawna goal khung an mamawh.
Substitute Kai Havertz chuan minute 89-naah an chakna goal ni tur a khung a. Mikel Arteta hnuaia vawi 200 an inkhelhnaah Gunners 1-0 in an chak.
Gtech Community Stadium-ah hian inkhel tan hma in a sang pahnihten point an hloh ve ve avangin Gunners in huntha an nei. Mahse Brentford lakah erawh hnehna chan a awlsam lo hle.
Leandro Trossard goal pawm loh an neih bakah Brentford goal khung tur tum khat chauh ni loDeclan Rice leh Oleksandr Zinchenko ten an dan a ngai.
Arsenal manager Mikel Arteta chuan, “Chak phu zawk kan ni in ka hria. Inkhel hautak takah theihtawp chhuah a chak tuma kan inel tlat dan kha fak loh theih a ni lo.” a ti.