Tun hnaia Myanmar indo thlaw- hna ten Myanmar Chin state chhimlam Lailenpi khaw chhehvel bomb hmanga an beih leh avangin Siaha district-ah raltlan mi 200 chuang an luh belh.
Home department hotu ten an sawi Siaha district-a Myanmr raltlan luh belh te hi Siaha district-a Laki, Zawngling, Chapui, Ahmyipi, Mobyu, Siasi, Khopai leh Theiva khua-ah te an awm darh a. Laki leh Zawngling khua-ah te raltlan tam ber nia thudawn a ni.
Kar kalta Thawhlehni leh Nilaini khan Lailenpi khaw bulah sipai sorkar dova rammute an awm nia hriain Myanmar indo thlawhnate chuan mipui awmna khaw hnaih ramngaw velah bomb an thlak chiam a. Hemi avanga ralkhela, Mizoram lama raltlan an nih thu thudawnna chuan a sawi a. Raltlante hi Mara hnam deuh vek nia hriat a ni.
Chin National Army (CNA) kaihhruai ‘mipui sipai’ tia an vuah te hian Mizoram ramri hrula Myanmar sipai camp awm te chu an la fai deuh vek tawh a. Zokhawthar ep Khawmawi-ah chuan Mizoram lam atanga luh dawna ‘Republic of the Union of Myanmar’ tih intar pawh ‘Welcome to Chinland’ tih ziakin an thlak tawh a. Myanmar hnam puanzar la thlain CNA puanzar a inzar tawh bawk a ni.
Hetihlai hian Chin state khawpui ber Halkha bakah Falam, Matupui leh Thantlang khuaah te chuan sipai an la inbun nia thudawn a ni a. Mipui rorelna duhtu pawl intelkhawm chuan an zalen tawhna-ah te ch- uan sikul leh damdawi in bakah sorkar fumfe taka kalpui turin ruahmanna an siam chho zel nia thudawn a ni bawk.