Aizawl : Champhai district leh Mizoram hmun thenkhatah chuap lam natna chi khat pneumonia natna vei tam mahse, chiaina tur era- wh a awm lo niin Health department thuneitute chuan an sawi.
Integrated Disease Surveillance Program- me (IDSP) thawktute chuan kumin April leh October thla inkar thla 7 chhung khan Champhai district-ah hian pneumonia avangin mi 12 an thi tawh niin an sawi a. Champhai atanga thudawnna pakhat chuan pneumonia vanga thi zat hi 16 an tlin tawh thu leh leh pneumonia vei naupang 700 vel an tling tawh niin a sawi bawk.
Champhai district hospital naupang ward-a enkawl lai naupang damlo 18 awm zinga 16 te chu pneumonia vei an ni a. Champhai District hospital-ah hian khum ruak a awm tawh loh avangin mimal enkawl damdawi in dangah te an inthawn nual tawh nia sawi a ni.
Director General of Health Services, Ministry of Health and Family Welfare Prof. (Dr.) Atul Goel chuan India rama state leh UT hrang hranga National Health Mission-a Mission Director-te hnenah lehkha thawnin, China-ah naupang lam thawk harsatna siamtu natna vei an tam thu chu sorkarin a hriat thu lehkhaah chuan a tarlang a. He thil avang hian chiaina tur erawh a awm lo chungin uluk taka zir chian ni se, a ti a. State tina IDSP te chu thil awm dan vil ngun a, damdawi in-a khum leh inenkawlna lam te pawh NHM Mission Director ten thlithlai reng ni se, a tiin a chah.
Kumin October thlaa China ram hmar lama arva pul hri (H9N2) leng, a bikin naupang lamin an kai tam bik chungchang chu India sorkar chuan ngun takin a thlitlai reng niin an sawi a. Arva pulhri (avian influenza) kai chhawng hi mihringah chuan an tam lutuk lo niin Health Ministry thuchhuah chuan a tarlang bawk.