An player langsar LeBron James-a’n mellung thar kai mahse Los Angeles Lakers erawhin boruak duhawm tak neiin hun an hmanpui thei lova. Philadelphia 76ers lakah point 44 ngawtin an tlawm.
Thawhlehni zinga Philadelphia a Wells Fargo Center a inkhelah hian James hi NBA chanchin a court chhunga player hun hmang tam ber record thar siamtu a ni a. Nimahsela 138-94 in an tlawm.
Philly star player Joel Embiid chuan point 30 score in rebound leh assist 11 ve ve a nei a, triple-double neiin quarter hnuhnung berah hahdamna hun tam zawk pek a ni a. Point guard Tyrese Maxey chuan point 31 leh assist vawi 8 a nei bawk.
Lakers tan point 18 score tu James chu point lama hmahruaitu a ni a, mikhual team zawkin kawng engkimah anmahni lo thlengtute an pha lo hle.
Kum 38 mi ni tawh James hian NBA-ah a season 21-na a khel mek a. Regular season leh Playoffs inkhel zawng zawng chhiar telin court chhungah minute 66,319 a khel tawh a, Kareem Abdul-Jabbar a record 66,297 chu a khum a ni.
February thla khan Adbul-Jabbar record tho point 38,387 chu a lo khum tawh bawk.
Thawhlehni zing inkhel hi NBA a a tlawm chian ber tum a ni a, kum 2019 khan Indiana Pacers kutah point 42 in Lakers team an tlawm chu an khum leh chiah a ni.