Premier League club Arsenal in league title lak an tumna kawngah inthuam that lam an ngaihtuah a, nikum atanga an ngaihven tawh Aston Villa midfielder Douglas Luiz chu lakluh theih dan an dap.
Nikum September khan Arsenal hian Luiz lei tumna hi tum thum lai an siam hnuah a club lamin an hnawl a. Brazil international hian kum 2026 thleng Villa a cham turin contract a ziak zui.
Luiz hi Villa-ah hian Unai Emery hnuaiah player pawimawh ni chhunzawm zelin tun season-ah Premier League match 13 an khelh tawhah a la khel kim vek a, league-ah che tha hle in palina an ni mek.
Gunners hian lakluh theih inbeisei viau mahse a hma a Pound maktaduai 25 vela lei an dilna aia sang daiha an dawr a ngai tawh dawn a. Tun nipuiah sum an hman nasat avangin manto takin an dawr thei ang em tih zawhna erawh a awm.
Hetihlai hian midfielder Thomas Partey an hralh chuan insiksawi theihdan an nei thei dawn nia ngaihna a awm bawk a. Hei vang hian Brazil midfielder hi ngawrh zawkin an ngaihven zui mek a ni.