Aizawl: National Highway-54 kawngpui laih mekah Serchhip district huam chhunga sorkarin ram a lak fel tawh, dan anga zangnadawmna dawng tawh, in la thiat duh lo chu nimin khan khawl hmangin thiahsak a ni.
Executive Magistrate-te kaihhruaina hnuaia in an thiah tak hi Chhingchhip Venghluna Lalthuthlunga Hnamte in a ni a, in thiahnaah hian Serchhip atangin police thahnem tak kalin kawngpui enkawltu, NHIDCL leh contractor te bakah khawtlang hruaitute an tel.
National Highway-54 kawngpui laih mekah hian an in awmna ram chu sorkarin lain dan angin zangnadawmna, compensation leh rehabilitation & resettlement sum leh pai an dawng tawh a, sum an dawn hnuah pawh an in hi an la thiat lo a, magistrate-ten an in thiahna tur thupek, eviction notice an pek hnuah leh Competent Authority for Land Acquisition (CALA), Serchhip bawrhsap pawhin a ngen leh hnuah pawh an la thiah loh avangin nimin khan an in hi khawl hmangin thiah a ni ta a ni.
Tar lan tawh thin angin National Highway-54 kawngpui laih mekah hian Serchhip district chhungah sorkarin ram a lak fel, zangnadawmna dawng tawh zinga za zela 93-te chuan an in an thiat fel tawh a, hetih lai hian in la thiat duh hi chhungkaw thenkhat an awm.
Nimin khan mahni in la thiat lote chu executive magistrate-te kaihhruaina hnuaiah endik a ni a, chhungkaw pahnihte chuan an in hi an thiah mek avangin thiah sak ngai lova lo thiat chhunzawm zel tura hriattir nghal an ni a, hma la duh lo, Lalthuthlunga Hnamte in erawh an thiahsak ta a ni.