(Chhunzawmna)A puankawp sin chuan ka’n khuh tha a. A hmel a la hlim hlë. “Ka läwm e, tunah zawng ka dam huai ta mai,” a han ti a. A ban të reuh të chu sai hlak hlakin a rawn phar chhuak a. A khum bul pawhdawh chu a’n ban a. Pawhdawh atang chuan tangkaraw pawisa tlang pakhat hi a rawn phawrh chhuak ta a. “I thatnate ngaihtuah hian eng tham a ni lo ve. Mahse, tun ang khaw vâwt tawrhhlelhawmah hi zawng coffee sa ver vawr han lem pawh a châkawm viauin ka ring,” a han ti a. Pawhdawh chu a la inhawng reng a. A chhunga pawisa tlang 20 vêl, a thil neih dangte zínga darh niai pawh chu ka va hmu a. Chu’ng zawng chu he khawvêla a pawisa neihchhun a ni. Ka lawm e, tih paha han dawnsak mai ka hreh ta tlat a, “Ni lo, Pu Ditto, ka la thei lo vang. Khaw nawm loh hun atán tia i khâwl khâwmte an ni si a,” ka han ti a.
Chu veleh a mit meng a dul rawih a, lungngaihnain a hmel ëng a rawn hliah a. “Khaw nawm loh leh awm har ní a awm tawh dáwn hlei nem,” a rawn ti chuai rawih a.
Ka harh zawk mai. Tar chak lo leh rethei, engmah pêk chhuah tùr dang nei lo, thihna mai lo a hma lama hmabâk hlen tùr nei tawh lo chu, rilru nuam taka a mihringpuite chunga a tih theih chhun ka hlawhchhamtir ang maw. Rang takin, “Pu Ditto, a nih leh ka läwm e. Cofee sa tha tak han lem aia châk ka nei hlei nem,” tih pahin pawisa tlang chu a kut atang chuan ka lâksak ta a. A hmel pawh a rawn hlim leh ta.
Ni a liam zël a, ani erawh muangchangin a chau tial tial thung. Tûk tinin tih tùr tül ka va tihsak ziah a. Ani pawh dawhthei tak leh chhel takin a lo inpeih zël thìn. A pindan ka chhuahsan dáwn apiangin pawisa tlang a phawrh ziah a, “I thatna ngaihtuahin eng tham a ni lo ve,” a ti ziah bawk.
Pawhdawh chhunga pawisa tlang chu a tlem tial tial a ni tih ka hre reng a. Neih nei lo tawpa a awm hun chu hmuh ka hreh tak zet a ni.
Tunah zawng chakna rëng a nei ta lo. Mahse, a kut pawh amahin a chêt zo tawh lo tih thleng chuan pawisa tlang min pêk erawh a theihnghilh si lo.
Ni khat chu a pawisa tlang hnuhnung ber a thleng ta! A kut chu dim të hian pawhdawh lamah ka chawisak a, ka mittui tla tùr ka insum nasa ngei mai. A hmelah erawh chuan pawisa tlang dang a neih tawh loh avànga danglamna hmuh tùr a awm hauh lo. Pawisa tlang chu a’n lek chhuak leh a, a ngai tëa hlim hmel pu sang chungin zawi të hian a thu ngai bawk min hlàn leh ta. A rilru chuan engkim a dáwn zo tawh lo a ni ngei mai. Pêk chhuah hlimna chu a thinlungin a hre reng a, a neih lam leh a la bäng lam a ngaihtuah thleng tawh lo. Dim të hian a pawisa tlang min pêk chu pawhdawh chhungah chuan ka thlâk thla leh ta a.
Chawlhkár hnih dang a la dam a. Tûk tinin ka tih tùr ka va ti chhunzawm zël a. A mutbu te ka han thlâksak hnu chuan, “Vantirhkoh i ni e, ka tán Vantirhkoh i ni chiang e,” ti hian a phun sep sep a. Chutah, a kut chu pawhdawh lama chawisak a hun tih ka hria a. A ngai tëin pawisa tlang chu min pe a. A ngai têin ka dah kir leh ta thìn a ni.
A peih rei tawh dáwn lo tih ka hriat chuan Rev. William Howard, kan chaplain chu ka chah ta a. Ani chu a lo kal a. Naupang muhìl tan tawh thawnthu hrilh ang maia zawi leh dam hian Bible a chhiarsak ta a:
Tichuan, mipuite chu a hmuhin tlángah a kal chho va, tin, a thu a, a zirtirte a hnênah an lo kal a; tin, thü a sawi a, anmahni a zirtir a. Rilrua retheite chu an eng a tháwl e; van ram an tä a ni si a. Lungngaite chu an eng a tháwl e, thlamuanin an la awm dáwn si a. Thuhnuairawlhte chu an eng a tháwl e; lei hi an la rochung dáwn si a.
(Chhunzawm tur)