Ram hmasawnna kan sawi a. Kiltinah hmasawnna kan duh. Hmasawnna kan sawiin hnathawh tam a ngaih thu kan hria. Hnathawk tam lo ramin hma a sawn ngai lo tih pawh kan hria. Mahse, engatinge hmasawnna kan sawi hian thingtlang lam hmasawnna leh hnathawh tam dan tur chauh kan sawi thin le. Kan Aizawl khawpui, mihring tamna ber hian hnathawh tam kan mamawh ber ani dawn lo’m ni. Mihring tamna ah hnathawh tam anih theih dan turte, thawh tur siam tam thiamte hi kan ke penna tur anih a rinawm. Khawpui mihring tamah hian hna thawk tam ila. Retheihna kan sawi pawhin thingtlang lam retheite dinhmun harsatzia kan sawi nasat ang hian Aizawl khawpuia retheite dinhmun pawh i vei tel ang u. Chutih rualin hna hi retheite thawh tam tur ani bik chuang hek lova. Mi zawng zawngin rualkhaia khawpuia hna kan thawh tam a ngai a ni.
Engtinnge khawpuiah hian tun aia hna kan thawh tam ang. Ruahmanna kan siam thiam a ngai a. Khawpuia hnathawk tam tur chuan hnathawh darkar kan siam rei thiam a ngai. Chhunah chauh hna thawk lova, mi rama an tih dan anga zan lamah pawh hnathawh theiha, kan electric eng te pawh tun aia khawpui kan tih en that a ngai bawk.
Zingkar atanga hnathawh kan zir a ngai a. Tuna kan hnathawh danah hi chuan zing dar 9 atanga tanin tlai dar 4 vel hi kan tin ani ber a. Nikhata kan hnathawh hunchhung hi darkar 7 atanga darkar 8 vel ani ber mai. Chhuna chauh hnathawh tura kan in ruahman hi a tlem lutuk a. Ram changkangah chuan darkar 10 aia tam hna an thawk tlangpui. A darkar zawnga hnathawh pawh ruahmanna kan siam a hun tawh. Zing dar 6 atanga hna tan pawl awm ila, chawhnu dar 2 vela thawk tan awm ila, zan lamah pawh chutiang bawkin thawk rei ila. A darkar zawnga hna kan thawh chuan a thawktuin hlawh a hmu tam ang a. A hnathawhna pawh a hlawk zawk bawk ang. Kan hnathawh hi zan dar 9 – 10 tal ni thei se chuan tun ai hian hma kan sawn zawk ngei ang.
Kan sawrkar office pawh hi an office hunah hian hna tak tak thawk sela. Zinga kal tlai, tlai lama haw hma nihte hi a zahthlak a. Rinawm taka mahni hnathawh apiang thawk tur kristiante hian hnathawh tam hi a bul kan tan that leh a ngai. Aizawl khawpui hi kan ram pumpui mipui entawn an ni a. Khawpuiin hna an thawh tam chuan thingtlang lam pawhin tun aiin an thawk tam sauh bawk ang. Chutianga kan ram mipuiin hna an thawh tam hunah ram nuam, ram changkang, ram hmasawnah kan insiam chho thei tawh ngei ang.