Kerala police-te chuan Assam hel pawl pakhat, Bodo an tiha tel ni ngeia an hriat mi 3 chu nimin khan Perumbavoor-ah an man.
Police hian a hma zanah Assam police hnen atangin thu an dawng a, an thu dawn bawhzui hian nimin zing khan heng mite hi an man a ni.
Police-te chuan an mi mante hi Perumbavoor-a plywood factory-ah an lo cheng a, hna thawk tura lut niin an insawi a. A hmain Assam police chuan Ernakulam rural SP chu fax hmangin an be lawk a, ani hian Intelligence Bureau thuneitute ko khawm nghalin hma an la ta a ni.
An mi mante hi Assam-a pawikhawihna hrang hranga lo inhnamhnawih tawh, UAPA leh Arms Act dan hmanga man theih nia sawi an ni a. Dan pawna awm mek, National Democratic Front of Bodoland (NDFB) member an ni ngeia hriat an ni.
An pathum hian state police-in thu an zawt fiah mek zel a, Kerala-a an luh dan hriat ngei pawh an tum a. Assam police atangin special team pawh an zin chhuak nghal a, nizan khan thleng hman tura beisei an ni.