Aizawl: Lalram Thanga leh Lalmalsawma (fam) te lehkhabu buatsaih, Mizoram Savate (Mizoram Birds Illustrated) tih chu nimin khan Chief Secretary Dr Renu Sharma in a tlangzarh.
He lehkhabuah hian Mizorama sava chi hrang 275, a lem nena an ziah a awm a. Mizorama sava zirna hmasa ber neih a nih dan te, sava hriat chian leh chhinchhiah dante leh sava zir turin tih tur leh tih theihte tar lan a ni.
Chief Wildlife Warden Conference Hall, New Secretariat Complex, Khatla-ah tlanzarh inkhawmah, lehkhabu tlangzarhtu Dr Renu Sharma chuan hetianga lehkhabu hlu tak, Mizo tawng ngeia ziak a ni hi lawmawm a tih thu leh, nungcha humhalh kawngah mipui zirtira kaihruaitu pawimawh tak a nih a beisei thu a sawi.
Lehkhabu ziaktu zinga pakhat Lalram Thanga pawhin an lehkhabu siam dan chungchang sawiin, a thianpa Lalmalsawma’n an zawh hma a a boralsan thut avanga harsatna an tawh dante a sawi a. Mizo mipuiten Mizoram sava hming, mahni tawng mai baka a sap hming tlanglawn leh scientific hming thlenga an sawi theih nana buatsaih an nih thu a sawi. Lehkhabu hi ramhnuai (field)-a sava zir mite tanpuitu (guide) ang tura an duan a ni tih a sawi bawk.
Lehkhabu tlangzarh rual hian Lalram Thanga kutchhuak sava leh ramsa lem thinga ker 50 chuang pho chhuah nghal niin, RS Sinha, PCCF/Principal Secretary, EF&CC Department chuan kalkhawmte en turin a khuh hawng nghal.
PCCF chuan thinga milem ker hi Mizote thiam zawng tak a nih a thu sawiin, “Kan ram rohlu tak tak nungcha leh sava te, mipui hmuh theiha phochhuah fo a pawimawh a. Zirlai leh thangtharte tan chona tha tak a ni,” a ti.
He Wildlife Wood Curving Exhibition hi vawiin thleng hian Chief Wildlife Warden Office Building-ah a duh apiangte chhim theih a ni.