India chu khawvela naupang, an nih tur ang ni lo awm zawng zawng hmun thuma thena hmun khat zet kawltu a ni tih Global Nutrition Report, 2022-ah tar lan a ni a. Heng naupangte hi thenkhat chu thanthu te, zâng lutuk te leh rit lutukin a tlakbuakte an ni.
Khawvel pumah hian hetiang naupang hi mtd 150.8 zet an awm a, an zinga mtd 46.6 chu India-a mite an ni a, a sang lawr lak a. India hnuaiah hian Nigeria (mtd 13.9) leh Pakistan (mtd 10.7) a ni a. Heng ram pathumah hian khawvela naupang nih tur ang ni lo chanve dawn hi an awm tihna a ni.
Hetih rual hian India hian hma a sawn ve hret tih erawh a lang thei a. National Family Health Survey-4 data thar ber atanga a lan dan chuan India-a nih tur ang ni lo naupang hi 10% zetin a tlahniam a. Kum 2005-06 data-ah 48% an awm laiin 2015-16 data-ah chuan 38.4% chauh an awm tawh a ni.
Naupang thanthu piah lamah hian India hi an san zawng ngaihtuaha zâng lutuk an tamna ram a ni bawk a. An san zawng nena an rih zawng inmil lo naupang hi mtd 25.5 zet India-ah an awm a, a dawrtu chu Nigeria (mtd 3.4) bawk niin Indonesia (mtd 3.3)-in an zui thung.
India-ah hian naupang sawngnawi an tih ang pawh an pung hret tih NFHS-4 atangin a lang thei a. Naupang kum 5 hnuai lam zingah sawngnawi hi 2005-06 inkarah 19.8% an awm laiin 2015-16-ah chuan 21% laiah a kaisang a, a tha lo hle.
India hi naupang rit lutuk tamna pawh a ni tel a, mtd 1 chuang a kawl mek a. A hnuaiah hian China, Indonesia, Egypt, US, Brazil leh Pakistan an awm bawk.
Khawvel pumah naupang sawngnawi hi mtd 50.5 an awm a, rit lutuk hi mtd 38.3 an awm bawk.
Tun tuma report-ah hian ram hrang 141 zeta naupangte dinhmun zir chian a ni a. Heng ram zinga 124 (88%) chuan ei tur khamkhawp nei lo naupang an kawl tih tar lan a ni bawk.