Azl: Ni hnih awh tur Lai Autonomous District Council thlasik thutkhawm chu nimin khan LADC Session Hall, Lawngtlaiah neih tan a ni.
LADC Chairman V.L.Hmuaka kaihhruaina hnuaia thutkhawmah hian LADC member hlui thi mi pathum sunna hun hman a ni a, an sun takte hi L.Hranghluna, VL.Rema leh F.Rohnuna te an ni.
Member thi sunna huna thusawitu, Chief Executive Member V.Zirsanga chuan an sun takte chu LADC sorkar hruaitu hlun leh nihna pawimawh tak tak – CEM, Chairman, Executive Member mawhphurna lo chelh tawhte an nih thu sawiin, “LADC tan hian thil hlu leh chhinchhiahtlak tam tak an thawkin an hnutchhiah,” a ti a, an mahni atang hian vawiina rorelna dawhkan kilte hian zir tur leh entawn tur tam tak an nei tih a sawi.
Member dangte pawhin an sun takte chanchin leh ram leh hnam tana an inpekna chanchinte sawiin, hemi hnuah minute khat chhung dingin sunna hun an hmang a ni.
MDC lo ni tawh chatuan ram pantate sunna hun hman zawh hian zawhna leh chhanna hun hman a ni a, zawhna pali awmin chhan vek a ni a, session hi vawiinah chhunzawm a ni ang.