Mizorama tlawmngai pawl hrang hrang intelkhawmna, NGO Coordination Committee chuan vote chhiar ni sawn tura an ngennaah thu lawmawm an dawn loh chuan ‘Kristian ni serh humhalhna punkhawm’ huaihawt an rel.
NGO Coordination Committee chu nimin tlai khan Central YMA Committee Room-ah an thukhawm a, Mizoram Assembly inthlan vote chhiar hun sawn tura NGO CC aiawh mi pangaten Delhi-a Chief Election Commissioner Rajiv Kumar leh a thawhpuite kawma ngenna an thlen chungchang an ngaihtuah ho a, ngenna an thlen chungchangah tun thlenga ECI atanga chhanna a la awm loh avangin vawiinah Mizoram pumah ‘Kristian ni serh humhalhna punkhawm’ huaihawt an rel a, Aizawlah chuan chawhma dar 11-ah Raj Bhavan hmar lam gate-ah hun hman tur a ni a, hemi rual hian district headquarters tinah pawh punkhawm hi huaihawt a ni dawn a ni.
Tar lan tawh thin angin, November 18-a NGO Coordination Committee thukhawm chuan vote chhiar hun sawn a nih theih nan ECI hotute chu an hmunpui ngeiah sawipui turin lamkal intirh an rel a, he an hmalakna hian awmzia a nei lo a nih chuan Protest Day kalpui turin thu an lo dah tawh a, an lo rel tawh anga ECI hotute hmaichhan ngeia an hmuh hnuah pawh an duh anga chhanna an hmuh mai tak loh avangin Protest Day hi an hmang dawn ta a ni.
Hetihlai hian Mizoram Kohhran Hruaitute Committee chuan nimin khan thuchhuah siamin vote chhiar ni sawn tura lehkha leh tawngkaa ngennain ngaih pawimawh a hlawh lo chu pawi an tih thu sawiin, ECI-in vote chhiar ni tura a ruat, December 3-ah Pathian biak inkhawm bak chu mipui punkhawmna lam chi buatsaih lova party office-te hawng lo turin political party zawng zawngte an ngen a ni.