ICFAI University, Mizoram chuan nimin khan Convocation Vawi 11-na an Campus, Durtlangah an nei a. He Convocation hi Visitor of ICFAI University, Mizoram Larsap Dr Hari Babu Kambhampati-a’n a kaihruai.
Visitor of ICFAI University, Larsap Dr Hari Babu Kambhampati chuan zirlai hlawhtling, degree nei thar te a lawmpui thu a sawi a. Zirlai hlawhtling te chu hma lam hun eng tak leh chona lian tham zawk ten an lo hmuak nghal a ni tih sawiin, nasa leh zuala tan la tur leh ram leh hnam tana thawk hlawk, khua leh tui tha ni turin a fuih.
Dr Hari Babu Kambhampati chuan ICFAI University Mizoram chu a hmasawnnaah te a lawmpui tih sawiin, NEP 2020 ruahmanna siam anga chak taka kal turin Vice Chancellor leh thawktute a chah a. Skill Development, Entrepreneurship, Reasearch leh Vocational Education lama thapui thawh turin a fuih bawk.
Khuallian Dr.G.Satheesh Reddy, President, Aeronautical Society of India pawhin thu sawiin, tun hmaa India rama zirlai thiam filawr tak tak te’n foreign ram hausa zawkah hna zawngin an chhuah thin chu tunah erawh a inthlak hlawk tawh a. Hna zawnga kal chhuak hmasa zawkte pawh India ramah lo kir lehin, Start Up India hnuaiah awlsam takin bul an tan a, he;ng te hi hun reilote chhungin cheng vaibelchhe tam tak hu company an ni tawh tih a sawi a. Mizo thalaite pawhin Start Up India leh Make in India hnuaiah Mizoramin hlawhtlin theihna a neih lai te dapchhuakin, hlawhtlinna an chan theih a rin thu a sawi.
Convocation ah hian ICFAI University Mizoramin sorkar atanga mipui rawngbawlna huangah te, zirna leh thil dangah te chawimawi phu te hnenah pek thin tur Honorary Doctorate Degree pek phalna a hmuh chu a vawi khatna atan, he chawimawina hi Mizo Folk Song & Dance huanga hna thawk tha, Padma Shree Award 2022-23 dawngtu KC Runremsangi hnenah an hlan.
11th convocation of ICFAI University Mizoram-ah hian zirlai 267 (UG&PG) ten degree an nei thar a ni. Graduate thar te hian Vice Chancellor Prof Bijay Singh hnen atangin Degree Certificate an dawng a. Khuallian Dr. G. Satheesh Reddy chuan zirlai titha zual zinga Silver Medalists te hnenah chawimawina thuziak leh medal a hlan a. Governor Dr Hari Babu Kambhampati hnen atangin Gold Medalist ten chawimawina thuziak leh medal an dawng thung.