Aizawl: Aizawl bawrhsap, District Election Officer (DEO) ni bawkm Nazuk Kumar chuan nimin khan political party hrang hrang aiawhte kawmin December 3, 2023 (Pathianni)-a Mizoram Assembly inthlanpuia vote chhiar chungchanga ruahmanna kalpui dante a sawipui.
Aizawl DC Conference Hall-a an inkawmnaah hian ECI ruahmanna ding mekah, vote hi zing dar 8 atanga chhiar tan tur niin, counting agent-te chu zing dar 7-ah a hmun thleng vek tura beisei an nih thu leh strong room hawn leh vote chhiar zawh a khar a nih lai hian party aiawhte an tel tur thu an sawi.
He huna tar lan anih danin Aizawl district-ah chuan counting centre pathum – DC Office, Assembly Annexe Sect. Basement leh Govt. Aizawl College Sikulpuikawn te a ni.
Vote chhiarna counting hall chhungah mobile phone ken luh phal a ni lo a. Venhimna pawh thuah thumin CAPF, IR Battalion leh Mizoram Police te an duty dawn a. Medical duty leh tul dang pawh ruahmanna siam a ni.
DC Office-ah hian Aizawl North II, Aizawl North III, Aizawl East I, Aizawl East II, Aizawl West I leh Aizawl West II assembly constituency a vote tla chhiar a ni ang.
Assembly Annexe Sectt. ah hian Tuivawl, Aizawl North I, Aizawl South II leh Aizawl South III constituency a vote tla te chhiar niin, GAC-ah hian Aizawl West III leh Aizawl South I Assembly constituency-a vote tla chhiar a ni ang.