Aizawl: India hmarchhak MP pangate ruala Japan ram an tlawhnaah Mizoram Lok Sabha MP C Lalrosanga’n Japan ramah Mizo thalaite tan eizawnna kawng hrang hrang a inhawn theih thu a sawi.
November 25, 2023 atanga chawlhkar khat thangin India hmarchhak MP parukten Japan ram fangin Japan MP-te leh mi pawimawh dangte an kawm kual a, India leh Japan thawhdunna leh inkungkaihnate huam zau zawk leh nghet zawka siam dan turte an sawipui.
Japan MP-te nen an inkawmnaah C Lalrosanga chuan Mizorama hna nei lo thalai mi thiam, Japan tawng zir thiam tan an Japan ramah eizawnna kawng a inhawn theih thu a sawi a. Japan company hrang hrangte tan Mizoram leh hmarchhak bial state dangahte hmasawnna hna thawh tur hrang hrang a awm thu a sawi.
Nimin khan hmarchhak MP parukte hian Japan State Minister for Foreign Affairs Hori Iwao hmuin India leh Japan thawhhona thute an sawipui a. Minister chuan India nena thawhdunna huam zautir zel an duh thu sawiin, a bik takin India hmarchhakte nen kawng hrang hrangah chak zawkin thawh ho theih a nih thu a lo hrilh.
Hmarchhak MP parukten nimin khan Japan Economy, Trade & Industry Minister Nishimura Yasutoshi leh Japan Prime Minister hlui, Yashihide Suga te an kawm bawk.
C Lalrosanga leh a thawhpui MP pangate hian nizan khan media te an kawm bakah khawtlang mi pawimawhte Tokyo-ah an kawm bawk a. Vawiin hian Tokyo chhuahsanin India an pan ang.