Aizawl: Ek Bharat Shreshta Bharat hmalakna hnuaiah Larsap Dr Hari Babu Kambhampati hoin nimin khan Nagaland State Day leh Assam Day (Asom Day) lawm a ni.
Assam hi January 26, 1950 khan India hnuai state a ni tawh a. Mahse, kum 1996 atang khan kum tin, December 2 hi Assam-ah Sukaphaa Divas tiin emaw, Axom Divas (Assam Day) tia hman ziah a ni tawh a. Hei hi Patkai tlang kal pela Ahom lal hmasa berin Assam luhna ni hriatrengna atan hman a ni.
Nagaland December 1, 1963 khan state-a puan a ni a, India state 16-na a ni.
Durbar Hall, Raj Bhavan-a state pahnihte day lawmnaah a thlengtu, larsap chuan state pahnih mipuite lawmpuina thu a sawi a. Assam leh Nagaland te state anga a lo pian theihna tur hruaitu hmasa leh theihtawp lo chhuahtute zahna chibai a buk.
Larsap chuan state dangte din cham inlawmpuina hian state danga chengte nena inpawhna tha zawk leh India ram anga inpumkhatna a siam tih a sawi a. Hnam dangte nena inthian tha tur chuan an culture leh an nunphungte hriat a, inzahsak a pawimawh tih a sawi bawk.
State pahnihte aiawhin zirlai hruaitu pahnih – Nganloi Phom, President, Naga Students Union, Mizoram University leh Mr. Biki Hazarika, President, Assam Association, Mizoram University te pawhin thu an sawi.