Aizawl: Sorkar laipui Ministry of Panchayati Raj bultuma Rastriya Gram Swaraj Abhiyan (RGSA) kaltlanga sum hmuh hmanga sak, Thenzawl Handloom Design Training & Production Centre chu nimin chawhma khan LAD Secretary Teresa Vanlalhruaii’n a hawng.
Thenzawl Handloom Design Training & Production Centre hi RGSA atanga VC ten tual chhung hmasawnna an thawh atanga sum an hmuh theihna tur leh self help group-te hmasawnna tur atana fund Rs nuai 141.23 a pek atanga building sakna tur bik a ruahman, Rs nuai 68 senga Thenzawl West VC te sak a ni.
Building hi chhawng khat niin a satuten an enkawl zui dawn a ni.
Building hawngtu, LAD Secretary Teresa Vanlalhruaii chuan sorkar laipuiin tual chhung inrelbawlna tihchak a ngaih pawimawh avangin VC-te mawhphurhna leh pawimawhna nasa takin a sang tawh a. VC-ten mipui tana hna an thawh theihnan sorkarin theihtawp chhuahin an kut a tichak a. VC-te chu mipuite hamthatna tura hna an thawh a pawimawh tak zet a, chutiang ni lova mipui nawlpui huap lo, mi thenkhat hamthatna tura hna an thawk a nih chuan an hlawhchham a ni tih sawiin, mipui nawlpui huapa hnathawk thin turin VC te chu a chah.
LAD secretary chuan sorkarin mipui tana tangkai tur bungrua a chhawpchhuak thin a, hengte hi enkawl zui a, neitu rilru put thiam a pawimawh tih sawiin, “Sorkar hmalakna reng reng a hlawhtlinna chu sorkarah ni lovin, mipuiah a awm a ni,” a ti.
LAD Director Rita Lalnunmawii Pachuau kaihhruai hawnna inkhawmah Thenzawl West VCP R. Lalramnghaka pawhin thu a sawi bawk.
Thenzawl Handloom Design Training & Production Centre-ah hian puan design training bakah a market leh thil tul dang chi hrang hrang buaipui chhoh zel tur a ni.
Tunah hian building sak zawk tawh niin, puantah khawl leh laban khawlte dah tawh a ni a. Sorkarin puan design zirtirtu tur a la rawih dawn bakah, khawl chi hrang hrang lei chhoh mek a ni.