Aizawl: Mamit District AIDS Prevention & Control Committee (DAPCC) huaihawtin Inrinni zing khan ‘World AIDS Day’ hman a ni.
Mamit Bazar-a ‘World AIDS Day’ hmanah hian DAPCC Member Secretary Dr Lalnuntluangi Khiangte chuan, kum tin December ni 1 hi World AIDS Day atana hman thin ni mah se, kumin bik atan thupuiin a tum angin mipui tam laia hman duh avangin Bazar Ni-ah hman a nih tak thu a sawi.
Dr Lalnuntluangi Khiangte chuan HIV/AIDS chu a thawktu mi tlemte te’n an do hneh lo tih sawiin, “India ram puma kan dinhmun enin khawtlang mipui, tupawhin a do hna kan thawh a tul ta a ni,” tiin, HIV/AIDS vei mekte endawng leh enhranna paih bo a, a do tura hmalak tul tawh zia hre thar a, do zel turin mipui a sawm.
HIV/AIDS natna an vei leh vei loh inhrechiang turin engtik lai pawhin ICTC Mamit-ah Councillor tha tak hnuaiah test theih reng a nih thu a sawi bawk.