Aizawl: ZPM Working President K Sapdanga’n Mizoram mipuite ngenna anga ECI-in Mizoram Assembly inthlan vote chhiar hun a sawi ta chu ZPM chuan lawmawm an tih thu a sawi.
Inrinnia thuchah a tihchhuahah K Sapdanga hian Mizoram mipuite ngenna tihlawhtlingtu ECI thuneitute chungah ZPM chuan lawmthu an sawi tih a sawi a. Vote chhiar hun sawn a nih theih nana rim taka hma latute zawng zawngte leh, a bikin hemi atana theihtawp chhuah a, sulsutu NGO Coordination Committee (NGOCC) leh Mizoram Kohhran Hruaitu Committee (MKHC) te an fakawm an tih thu an sawi.
ZPM Working President hian October 9, 2023-a inthlan hun puan a nih khan a, vote chhiar hun atana ruat December 3, 2023 (Pathianni) chu Kristiante ni serh, Pathianni a nih vangin ZPM Party chuan tha an tih loh thu a sawi a. Inthlan puan tuk, October 10, 2023 khan ECI hnenah vote chhiar ni sawn tura ngenna an party President Lalliansawta hminga an thlen nghal a, chhanna an dawn mai dawn mai tak loh avangin November 9, 2023 khan a tum hnihna atan ngenna an thlen leh thu a sawi bawk.
“Vote chhiar hun sawn a nih theihna atana thahnemngai taka Kohhran mipuite tawngtaina chhangtu Pathian chu fakin awm se, a hun taka thawk thin kan Pathian hian Mizoram mipuite min lo hre reng a ni tih min hriat thartirtu lo ni se tih hi ZPM duhdan a ni,” K Sapdanga’n a ti.