Juventus in huntawp dawnah goal chhuah mahse chakna goal an khung hman thova, 2-1 a hnehna changin Serie A table chung berah an inhlangkai lailawk.
Zirtawpni zan Serie A inkhelah Juve hian Monza hmachhawnin U-Power Stadium an tlawh a. Minute 94-naah Adrien Rabiot-a ball pass tha atangin Federico Gatti chuan hun remchang a nei a, a tirah ball pet fuh lo mahse insiamtha hmanin an chakna goal a khung.
Hemi hma lawk hian Monza in huntawp dawn hun pek belhah tho goal an khung a. Valentin Carboni chuan minute 91-naah mualneitu lam si phurh a sut.
Juventus in minute 11-naah Giorgos Kyriakopoulos foul avangin penalty an hmu a, Dusan Vlahovic-a pet chu Monza goalkeeper Michele di Gregorio chuan a save sak.
Mahse a hnu lawkah French midfielder Rabiot-a’n corner atangin an goal hmahruai a tauh lut.
Juve manager Massimiliano Allegri chuan, “Team tha, tunlaia kheltha tak laka hnehna chang kan nih avangin kan result a pawimawh hle.”
“Kan hmahruaina belhchhah theihna hun kan nei a, mahse second half-ah ball an kawl nghet hle. Risk kan la ngam lo thin a, an goal khung turin Carboni kha kan veng tha tawk lo.” tiin an inkhel a thlirlet.
Inrinni zanah San Siro-ah AC Milan in 3-1 in Frosinone an hneh a. Luka Jovic, Christian Pulisic leh Fikayo Tomori ten Rossoneri tan goal an khung.